Vazirliklar qisqardi, endi 2023 yilgi budjet qayta taqsimlanadimi?

Vazir o‘rinbosari Jamshid Abruyevning ta’kidlashicha, qisqartirilgan va qo‘shib yuborilgan vazirlik, idoralarning vazifalari aniq bo‘lgan, davlat budjeti to‘g‘risidagi qonun qayta ko‘rib chiqiladi.

«3 kundan keyin yanvar oyi boshlanadi. Odamlarga oylik berish kerak, dori, oziq-ovqat, umuman har xil xarajatlari bor. Bu ishlar Senatgacha ma’qullangan qonun asosida amalga oshirilaveradi. Lekin vazirliklar tarkibi, nomi o‘zgarishi Budjet kodeksida ham ko‘zda tutilgan. Bu bo‘yicha qonunga belgilangan tartibda o‘zgartirish kiritiladi.

Qonun qabul qilinganidan keyin har bir vazirlikning tuzilmalari qabul qilinadi. Vazirlikda necha kishi bo‘ladi, ularga qanday vazifalar yuklatiladi – shundan kelib chiqqan holda ularning budjeti qayta hisoblanadi», dedi Abruyev.

Uning qo‘shimcha qilishicha, keyinchalik qonun bilan tasdiqlangan budjet va optimallashgani aniq bo‘lgach, ortib qolgan mablag‘ ijtimoiy himoyaga yo‘naltiriladi. Bu haqda moliya vaziri Temur Ishmetov ham gapirgandi. Jamshid Abruyevga ko‘ra, bu bo‘yicha tayyorlangan hujjatlar Oliy Majlisga kiritiladi, o‘rnatilgan tartibda unga o‘zgartirish kiritilgach, mablag‘lar belgilangan tartibda sarflanadi.