2026 yil budjeti ijrosi bo‘yicha chora-tadbirlar tasdiqlandi

“2026 yil uchun O‘zbekiston davlat budjeti to‘g‘risida”gi qonun ijrosini ta’minlash chora-tadbirlari to‘g‘risidagi prezident qarori qabul qilindi. Hujjatda budjet mablag‘larining cheklangan miqdorlari, daromadlar prognozi va mahalliy budjetlar bo‘yicha tushumlarni taqsimlash tartibi belgilab qo‘yildi.

2025 yil 26 dekabr kuni “O‘zbekiston Respublikasining ‘2026 yil uchun O‘zbekiston Respublikasining Davlat budjeti to‘g‘risida’gi qonuni ijrosini ta’minlash chora-tadbirlari to‘g‘risida”gi prezident qarori (PQ–388-son) qabul qilindi.

Qaror bilan 2026 yilda 2-darajali budjet mablag‘larini taqsimlovchilarga ajratiladigan budjet mablag‘larining cheklangan miqdorlari tasdiqlandi. Shuningdek, 2026 yil uchun respublika budjeti, Qoraqalpog‘iston Respublikasi budjeti, viloyatlar va Toshkent shahar mahalliy budjetlari aylanma kassa mablag‘larining yo‘l qo‘yiladigan eng kam miqdorlari belgilandi.

Hujjatda 2026 yil uchun O‘zbekiston davlat budjeti daromadlari prognozi ham tasdiqlangan. Shu bilan birga, 2026 yilda foyda va qo‘shilgan qiymat soliqlari to‘liqligicha respublika budjetiga yo‘naltiriladigan yirik soliq to‘lovchilar ro‘yxati ma’qullangani qayd etildi.

Qarorga muvofiq, quyidagi soliq turlari bo‘yicha daromadlar prognozining oshirib bajarilgan qismi Qoraqalpog‘iston Respublikasining respublika budjeti, viloyatlarning viloyat budjetlari hamda Toshkent shahri shahar budjetida belgilangan miqdorlarda qoldiriladi. Jumladan, jismoniy shaxslardan olinadigan daromad solig‘i va foyda solig‘i bo‘yicha oshirib bajarilgan tushumlar to‘liq hajmda mahalliy budjetlarda qoldiriladi.

QQS bo‘yicha esa Qoraqalpog‘iston Respublikasida daromadlar prognozining oshirib bajarilgan qismining 100 foizi, qolgan hududlarda esa 60 foizi tegishli mahalliy budjetlarda qoldirilishi belgilandi.