Ukrainadagi urush: Putin vaqtincha o‘t ochishni to‘xtatishni buyurdi

Rossiya prezidenti Vladimir Putin 7 yanvar kuni nishonlanadigan pravoslav Rojdestvo bayrami munosabati bilan Ukrainada o‘t ochishni to‘xtatish rejimini joriy etish haqida ko‘rsatma berdi. Bu haqda Kreml ma’lum qildi, deb xabar berdi «Interfaks».

 O‘t ochishni to‘xtatish rejimi 6 yanvar soat 12:00 dan 7 yanvar soat 24:00 gacha amal qiladi. Putin mudofaa vaziri Sergey Shoyguga patriarx Kirillning murojaati munosabati bilan shunday buyruq bergan. 

«Jang hududlarida pravoslavlikni tan olgan ko‘plab fuqarolar istiqomat qilayotganidan kelib chiqib, biz Ukraina tomonini o‘t ochishni to‘xtatishni e’lon qilishga va odamlarga Rojdestvo arafasida, shuningdek, Rojdestvo bayramida diniy marosimlarda qatnashish imkoniyatini berishga chaqiramiz», deyiladi Putin buyrug‘ida. 

5 yanvar kuni ertalab patriarx Kirillning rus pravoslav cherkovi saytida «o‘zaro mojaroga aloqador barcha tomonlarni» Rojdestvo sulhiga chaqiruvchi murojaati e’lon qilingan edi. 

Ukraina prezidenti Vladimir Zelenskiyning kabinetida Rus pravoslav cherkovi rahbarining taklifi «bema’ni tuzoq va tashviqot elementi» deb ataldi. Ukraina prezidenti devonining maslahatchisi Mixail Podolyak rus pravoslav cherkovi global pravoslavlik uchun avtoritet emasligini ta’kidladi va «urush targ‘ibotchisi» rolini o‘ynashini, shu jumladan «ukrainaliklarni genotsid qilishga» chaqirayotganini aytdi.