“O‘zgarish bor, ammo yetarli darajada emas” – Angrenning ishonchli boshqaruvdan olingan isitish tizimi qanday ishlayotgani haqida reportaj

{Yii::t(}

O'tkazib yuborish 6s

O'tkazib yuborish

Dastlab voqealar xronologiyasiga to‘xtalsak

3 yanvarda Kun.uz’da Angrendagi ko‘p qavatli uylar aholisi salkam 2 oydan beri sovuq xonadonlarda yashayotgani haqida maqola e’lon qilindi. Shundan so‘ng, shahar hokimiyati va prokurori materialga munosabat bildirdi. Unga ko‘ra, odamlarga issiqlik uzatilmayotganiga hokimiyatning ham, “teploset”ning ham aloqasi bo‘lmagan, vaziyat issiqlik beriladigan manba – Angren IES bilan bog‘liq bo‘lgan.

Gap shundaki, Qozog‘istonga tegishli kompaniya “Central Asia Energy” MChJga berib yuborilgan eski Angren IESga kuz-qish mavsumi uchun yetarlicha mablag‘ o‘z vaqtida ajratilmagan, shu sababli stansiyada avariyalar yuzaga kelavergan, aholi esa sovuqda yashayvergan.

Ayni shu sababli hukumatning tegishli qarori bilan yanvardan boshlab IES ishonchli boshqaruvdan olindi, bu haqda shahar prokurori Ulug‘bek Habijonov tahririyatga ma’lum qilgan edi. Shundan keyin 2 yanvardan aholiga belgilangan me’yorda issiqlik uzatib borilayotgani haqida xabar berildi.

Xo‘sh, ayni vaqtda Angrenda ahvol qanday, odamlarning uyiga haqiqatan ham issiqlik yetib boryaptimi?

Buni bilish maqsadida dastlab Angren shahar uy-joy kommunal xizmat ko‘rsatish bo‘limi rahbari Komronbek Karimov bilan gaplashdik. Uning aytishicha, Angrenda 823 ta ko‘p qavatli uylar joylashgan bo‘lsa, shuning 639 tasi markaziy issiqlik tizimiga ulangan.

“Angren IESda noyabr oyida avariya holati bo‘lgani uchun bir haftalik uzilish kuzatilgan. Dekabr oyining 24-29 sanalarida ham IESning 10-energoblokida buzilish kuzatilgan. Bu bo‘yicha shahar hokimi tomonidan chora ko‘rilib, yuqori tashkilotlarga xat chiqildi. Bu – bir yillik muammo emas, o‘tgan yili ham IESda shunday avariyalar kuzatilib, qish mavsumida noqulayliklar yuzaga kelgan edi. Oxirgi 3-4 yilda ketma-ket shunday holatlar bo‘laverdi, chunki o‘sha vaqtda IES tashqi boshqaruvda edi.

Yanvardan tashqi boshqaruvdan olinib, “Issiqlik elektr stansiyalari” AJga berildi. Endi bizga berilganidan boshlab shaxsan mening asosiy vazifam – aholiga me’yor darajasida issiqlikni yetkazish bo‘ldi”, – dedi Karimov.

Shuningdek, uning qo‘shimcha qilishicha, noyabr va dekabr oyini hisoblaganda 20 kundan jami 40 kun aholi issiqlik bilan ta’minlangan, ammo me’yor darajasida emas. Shu sababli mana shu kunlar uchun odamlar issiqlikka pul to‘lamasligi, Angren “Issiqlik enegriyasi” DUKda qayta hisob-kitoblar qilingani aytildi.

Shundan keyin odamlarga necha darajada issiqlik uzatilayotgani bilan tanishish uchun Angren IESning o‘ziga bordik. Navbatchi muhandis Alimardon Eshboyevning aytishicha, hozirda stansiyada 2 ta energoblok ishga tushirilgan.

“10-energoblokimizda 110 megavatt, boshqasida esa 35 megavatt – jami 140 megavatt elektr toki olyapmiz. Shaharga 68 darajada issiqlik uzatilyapti. Qaytish harorati 48 daraja, 6/2 bosimda borib, 2/0 bosimda qaytyapti. 3 ming 400 tonna issiqlik berilyapti, aholidan 2 ming tonna bo‘lib qaytyapti. Hozirgi ko‘chadagi ob-havo sababli 16 daraja yo‘qotilyapti. “Teploset”ga ko‘ra, aholiga sof boradigan issiqlik 60-62 darajani tashkil etadi. Hozirgisi 68 daraja, buni 70 ga chiqarish harakatidamiz.

IESda 2 ta qozon ishlayapti, 3-qozonni ham yoqyapmiz. Unda hali ulanish harorati yetib kelgani yo‘q. 9-qozonimizda sal yorilish paydo bo‘lgani uchun shahardagi harorat tushib qolgan. Yaqin soatlarda 3-qozonimiz ham tayyor bo‘ladi, uni ham ulaymiz.

Qozonlarimiz mazut bilan ko‘tariladi, shu vaqtgacha Qozog‘istonga tegishli kompaniya (eski rahbariyat) mazkur yoqilg‘ini olib kelmagani va qozonlarimizning ta’miri ham kechikkani uchun mana shu energobloklar ishlamagan”, – dedi navbatchi muhandis.

Shu nuqtaga kelganda IESning tijoriy masalalari bo‘yicha direktori intervyuni to‘xtatib, bu savolga o‘zi javob berishini aytdi.

“IES 2019 yilda ishonchli boshqaruvga berilgan. Ungacha bizning stansiya IES AJ tarkibida bo‘lgan. Alohida chiqqanimizdan keyin o‘zimizni o‘zimiz boshqarish jarayoniga o‘tganmiz. Ishlash jarayonida har xil holatlar bo‘lgan, avariyaviylari ham, yaxshi ishlaganlarimiz ham.

Biz Angren aholisiga issiqlikni yetkazib beramiz, ularning IES oldida 180 mlrd so‘mlik qarzi bo‘lgani uchun mana bunday o‘chib qolishlar, issiqlikni yetkazib berolmaslk holatlari yuzaga kelgan.

Rahbar Qozog‘istondan yoki O‘zbekistondan bo‘ladimi, o‘zining yetarli mablag‘i bo‘lmagandan keyin qaysi rahbar bo‘lishidan qat’iy nazar, o‘sha ahvolga tushaveradi. Qarzdorlikni undirolmaslik natijasidan kelib chiqqan holat bu”, – dedi Zoidilla Shoismatov.

Tijoriy masalalar bo‘yicha direktorning aytishicha, hozirda eski Angren IESdagi 2 ta qozondan tashqari, yaqinda 3-energoblokni ham ishga tushirish, odamlarga issiqlikni to‘liq yetkazish rejalashtirilgan.

Xo‘p, holat o‘tgan yilgi noyabr, dekabr oyidan yaxshilandi deyildi. Bu borada aholining o‘zi nima deydi? Surishtiruvimiz davomida bir qancha mahallalarda bo‘ldik, xonadonlarga kirib, odamlar bilan suhbatlashdik. Issiqlik qay darajada yetkazilayotgani bilan tanishdik. Holat kutilgan darajada emas. Odamlarga 30 darajada issiqlik berilayotganiga ham guvoh bo‘ldik. Kun.uz’ga berilgan so‘nggi ma’lumotlarga ko‘ra, Angren shahar Dorilfunun mahallasidan ketganimizdan keyin odamlarga issiqlik berilishi to‘xtagan.

Ma’lumot uchun, 16 yanvar kuni energiya resurslari ta’minoti aholini energiya resurslari bilan uzluksiz ta’minlash bo‘yicha ko‘rilayotgan chora-tadbirlar yuzasidan o‘tgan yig‘ilishda prezident o‘z vazifasini uddalay olmagan bir qancha amaldorlar qatori «Issiqlik elektr stansiyalari» aksiyadorlik jamiyati raisi Farhod Abdurahmonovni ham ishdan oldi.

Shuningdek, Shavkat Mirziyoyev respublikaning qolgan hududlarida ham ahvol yomonligini tanqid qilib, barcha darajadagi rahbarlarning eng katta vazifasi – elektr va gaz tarmoqlarining uzluksiz ishlashini ta’minlab berish ekanini aytgandi.

“Energiya ta’minotida qayerda uzilish bo‘lgan bo‘lsa, uning sabablarini ko‘rsatib, oqibatlari qancha muddatda bartaraf etilishini odamlarga tushunarli tarzda yetkazish zarur”, – degan Shavkat Mirziyoyev.