O‘zbekiston, Qirg‘iziston, Qozog‘iston va Rossiya ombudsmani qo‘shma qabuli tashkil qilinadi

4 ta davlat ombudsmani huquqlari cheklangan yoki buzilgan fuqarolarni birgalikda qabul qiladilar.

Qirg‘iziston, O‘zbekiston, Qozog‘iston va Rossiya ombudsmanlari hamkorligida fuqarolar qabuli tashkil etiladi. Bu haqda Qirg‘iziston Respublikasi Akyikatchi instituti matbuot xizmatiga tayanib, 24.kg xabar berdi.

Xabarga ko‘ra, Rossiya, Qozog‘iston, O‘zbekiston, Qirg‘iziston va Moldova ombudsmanlari bilan hamkorlik memorandumi imzolangan.

Ombudsmanlar o‘z mamlakatlari fuqarolarining huquq va erkinliklari buzilganligi ma’lum bo‘lgan holatlar to‘g‘risida bir-birini xabardor qiladilar, o‘z vakolatlari doirasida inson huquqlarini tiklashga hissa qo‘shadilar.

2023 yilda ombudsmanlar quyidagi tadbirlarni rejalashtirmoqda:

- huquqlari cheklangan yoki buzilgan fuqarolarni birgalikda qabul qilish;

- fuqarolarning huquq va erkinliklariga rioya etilishini monitoring qilish;

- ish, ta’lim, davolanish va boshqa maqsadlarda o‘z davlatlaridan tashqariga chiqayotgan fuqarolar uchun qo‘shma axborot kampaniyalari;

- inson va fuqaroning huquq va erkinliklari sohasidagi eng dolzarb qiyinchiliklarni birgalikda muhokama qilish.

Hamkorlik doirasida tomonlar migrantlarni qo‘llab-quvvatlash, shuningdek, o‘z mamlakatidan tashqarida ovoz beradigan fuqarolarning saylov huquqlarini ta’minlash bo‘yicha tajriba almashishga kelishib oldilar.