«Ақ Жўл» демократик партияси қачонлардир Европа Иттифоқига қўшилиш масаласини кўтаришни режалаштирмоқда.
Қозоғистоннинг «Ақ Жўл» демократик партияси мамлакат тараққиётнинг Европа йўлини, давлат ва жамият ўртасидаги муносабатларда европача ёндашувларни, ҳаёт сифатининг Европа стандартларини жорий қилиши керак, деб ҳисоблайди.
Шу боис, келгусида «Ақ Жўл» партияси Қозоғистоннинг Европа Иттифоқига қўшилиши масаласини кўтаришни режалаштирмоқда, деди партия етакчиси Азат Перуашев.
«Бизнинг танловимиз – «Ақ Жўл» демократик партиясининг танлови – Европа тараққиёт йўлидир... «Алаш» етакчиси Алихон Бокейхон ёзганидек, биз келажакни Ғарб давлатларининг энг яхши ютуқларига қўшилишда кўрамиз. Қолаверса, «Ақ Жўл» партияси узоқ муддатли истиқбол сифатида нафақат Европа ёндашувларини жорий этиш, балки Қозоғистоннинг Европа Иттифоқига қўшилиши масаласини келажакда қачонлардир қўйишни ҳам кўриб чиқади», деди Перуашев.
Европа йўлига мисол тариқасида Перуашев адолатли сайловлар ўтказиш, бунинг учун электрон овоз бериш тизимини жорий этиш, мустақил ва адолатли суд яратиш, демократия ва парламентаризмни ривожлантириш зарурлигини айтди.
Қозоғистоннинг «Ақ Жўл» демократик партияси Қозоғистондаги ўнг қанот сиёсий партия бўлиб, ўзини «конструктив мухолифат» деб билади. Қозоғистон Марказий сайлов комиссияси маълумотларига кўра, партия аъзолари сони 175 мингдан ортиқ. У ҳокимият тепасидаги президентга алоқадор «Нур Отан» партиясига «қулай рақиб» ҳисобланади ва кўпинча шу сабабли танқидларга учраган.
