Yer silkinishi magnitudasi 3,8 ballni tashkil qilgan.
Nyu-Yorkda 3,8 magnitudali zilzila sodir bo‘ldi. Bu haqda 6 fevral kungi zilzilalar interaktiv xaritasi ma’lumotlari dalolat bermoqda. Ijtimoiy tarmoq foydalanuvchilari ham Nyu-York g‘arbida, Lakavanna, Kenmor, Baffalo, Amxerst, Hamburg va G‘arbiy Seneka shaharlarida sezilarli silkinishlar haqida xabar berishgan. Zilzila oqibatida jabrlanganlar yoki yetkazilgan zararlar haqida ma’lumotlar yo‘q.
6 fevral kuni tunda seysmologlar Turkiyaning G‘oziantep shahri yaqinida, Suriya chegarasiga yaqin joyda 7,7 magnitudali zilzila qayd etdi. Umuman olganda, hududda 30 dan ortiq yerosti silkinishlari qayd etilgan. Turkiya xatarning eng yuqori darajasini e’lon qildi. Favqulodda xizmatlar yuqori shay holatga keltirildi. Ayni paytda 1000 dan ortiq odam halok bo‘lgan, 5,3 mingdan ortiq kishi jarohatlangani aytilmoqda.
Zilzila oqibatlari Suriya viloyatlariga ham ta’sir ko‘rsatdi. Hozirda qutqaruv ishlari olib borilmoqda. So‘nggi ma’lumotlarga ko‘ra, 371 kishi halok bo‘lgan, yana 1089 kishi jarohatlangan.
Shu kuni Gruziyaning Abxaziya hududi aholisi yer silkinishi haqida xabar berdi. Guvohlarning so‘zlariga ko‘ra, ko‘p qavatli uylarda qandillar tebrangan, eshiklar ochilib ketgan. Zilzilani Gruziyaning Batumi shahri aholisi ham his qilgan. Ijtimoiy tarmoqlarda ular kvartiralarda qandillar tebranib turgani, mebellar silkinayotgani va devorlar tarsillagani aks etgan videolarni tarqata boshladilar.
