Zelenskiy: Shols va Makron bilan umumiy qarashlar mavjud

Ukraina davlati rahbari muloqotni «kuchli uchrashuv» deb atadi. 

«Uchalamiz ochiqchasiga gaplashdik va bu urush istiqbollari bo‘yicha umumiy tushunchaga ega bo‘lish imkonini berdi. G‘alaba sari yo‘l bo‘yicha umumiy fikrga egamiz», deb ta’kidladi Zelenskiy. 

U, shuningdek, Kiyevning Yevropa integratsiyasi masalasiga to‘xtalib, Ukraina joriy yilda Yevropa Ittifoqiga a’zo bo‘lish bo‘yicha muzokaralarni boshlay olishiga ishonch bildirdi.

Avvalroq Ukraina prezidenti Volodimir Zelenskiy Rossiya Federatsiyasining 199 fuqarosi, shuningdek, bir ukrainalikka qarshi sanksiyalar joriy etish to‘g‘risidagi farmonni imzolagandi. 

Jazo choralari haqidagi qaror Milliy xavfsizlik va mudofaa kengashi (MXMK) tomonidan qabul qilingan. 

Ukrainaning qora ro‘yxatiga «Rosenergoatom» kompaniyasi rahbari Andrey Petrov, «Rosatom» davlat korporatsiyasi rahbari o‘rinbosari Yuriy Yakovlev va Rossiya prezidenti Vladimir Putinning tashqi siyosat bo‘yicha yordamchisi Yuriy Ushakovlar kiritilgan. 

Yagona ukrainalik - rus qo‘shinlari tomonidan qo‘lga olingan, ruslar tomoniga o‘tgan va noyabr oyida ular tomonidan Zaporijjya AES direktori etib tayinlangan Zaporijjya AES bosh muhandisi o‘rinbosari Yuriy Chernichuk.