Britaniya: Rossiyaning 40-60 ming harbiy xizmatchisi halok bo‘ldi

Ukrainada Rossiya urushi boshlanganidan beri, Rossiya Mudofaa vazirligi va «Vagner» xususiy harbiy kompaniyasi kuchlarining 175-200 ming jangchisi halok bo‘lgan va yaralangan bo‘lishi mumkin. Bunday ma’lumotlar Buyuk Britaniya Mudofaa vazirligining 17 fevral, juma kuni kundalik hisobotida keltirildi. Britaniya razvedkasi ma’lumotlariga ko‘ra, jami 40-60 ming harbiy halok bo‘lgan. Buyuk Britaniya Mudofaa vazirligi ma’lumotlariga ko‘ra, Rossiyada «qisman safarbarlik» o‘tkazilgan 2022 yil sentabridan buyon ularning soni sezilarli darajada oshgan. 

Zamonaviy standartlarga ko‘ra, halok bo‘lganlar va yaradorlar nisbati - yuqori, deb ta’kidladi Britaniya razvedkasi. Bu, albatta, shaxsiy tarkibning ko‘pchiligi uchun o‘ta qoniqarsiz tibbiy yordam bilan bog‘liq, deyiladi hisobotda. 

Yo‘qotishlar asosan artilleriya zarbalari natijasidir, deya ta’kidlaydi Britaniya Mudofaa vazirligi. 

«Vagner guruhi» juda ko‘p sonli jangchilarni jalb qildi. Ular orasida yo‘qotishlar 50 foizga yetishi mumkin, deya ko‘rsatilgan xulosada. 

Norvegiya Qurolli kuchlari bosh qo‘mondoni general Eyrik Kristoffersen 22 yanvar kuni Norvegiyaning TV 2 telekanaliga bergan intervyusida Ukrainadagi urushda qariyb 180 ming rossiyalik askarlar halok bo‘lgani yoki yaralanganini aytdi. 

Ukrainaning yo‘qotishlari 100 000 dan oshib ketishi mumkin, deya qo‘shimcha qildi Kristoffersen. Bundan tashqari, Ukrainada urush natijasida 30 mingga yaqin tinch aholi halok bo‘ldi, deya ta’kidladi u. 

2022 yil 21 sentabr kuni mudofaa vaziri Sergey Shoygu Rossiyaning Ukrainadagi yo‘qotishlari 5937 kishini tashkil etayotganini ma’lum qildi. 

12 fevral kuni CNN ikki sobiq vagnerchi bilan intervyuni e’lon qildi. Ularning ikkalasi ham frontda ukrainaliklar tomonidan asirga olingan va Rossiya qamoqxonasidagi urushga yollangan, deb ta’kidladi telekanal. 

Asirlar «vagnerchilar» orasida ko‘plab qurbonlar haqida gapirib berishdi. «Biz 90 kishi edik. Birinchi hujumda 60 kishi halok bo‘ldi, minomyotdan o‘q uzildi», dedi ulardan biri Luhansk viloyatidagi Belohorovka yaqinidagi hujum haqida. Yana bir yollanma askar Luhansk viloyatining Lisichansk shahriga besh kun davom etgan hujumda ishtirok etgan: «Biz buyruqsiz chekinishimiz mumkin emas edi, chunki agar buyruqqa rioya qilmasak, bizni o‘ldirishardi». Uning so‘zlariga ko‘ra, bir kishi yashiringan, keyin unga qabr qazdirishgan va otib tashlashgan.