O‘zbekiston tog‘li hududlarida Navro‘z bayrami arafasida qor yog‘di (video)

Ertaga, 21 mart kuni O‘zbekistonda Navro‘z bayrami nishonlanadi. Bayram arafasida mamlakatning ayrim hududlarida qor yog‘di.

“O‘zgidromet” yetakchi mutaxassisi Erkin Abdulahadovning ma’lum qilishicha, Qashqadaryo viloyati Shahrisabz tumani G‘yelon qishlog‘ida qor yog‘gan.

Bundan tashqari, Kitob tumanining Aspiduxtar va Denovbola qishloqlarida ham qor yog‘di.

Namangan viloyati Qamchiq dovoni hududidagi tunnellar oralig‘ida ham qor yog‘ishi qayd etildi.

Sinoptiklar xabar berishicha, 20 mart kuni respublikaning tog‘oldi va tog‘li hududlarida havo biroz bulutli bo‘ladi, vaqti-vaqti bilan yomg‘ir yog‘adi, ba’zan kuchli bo‘ladi, momaqaldiroq bo‘lishi mumkin.

Sharqdan 7-12 m/s tezlikda shamol esadi. Kechasi +2...+7 daraja, kunduzi +10...+15 daraja bo‘ladi.