Vengriya Yevroittifoqning Putinni hibsga olish orderi haqidagi bayonotini blokladi

Vengriya Yevropa Ittifoqi davlatlarining Rossiya prezidenti Vladimir Putinni Xalqaro jinoiy sud (XJS) tomonidan hibsga olishga order berilgani haqidagi qo‘shma bayonotini nashr etishga to‘sqinlik qildi. Bu haqda 20 mart, dushanba kuni manbalarga tayanib, Bloomberg agentligi xabar berdi.

Budapeshtning pozitsiyasi tufayli Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel o‘z nomidan bayonot berib, XJS qarorini «eslatmaga olganini» aytdi. «Xalqaro jinoiy sudning Vladimir Putinga qarshi qarori juda muhim voqea, o‘yinni o‘zgartiruvchi omil», dedi Borrel va orderni «Rossiya rahbarlarini Ukrainadagi jinoyatlar uchun javobgarlikka tortish jarayonining boshlanishi» deb atadi.

20 mart kuni Yevropa Ittifoqi adliya vazirlari XJS qarorini qo‘llab-quvvatlovchi o‘z bayonotlarini e’lon qilishdi, Vengriya uni ham imzolamadi, deb ta’kidlaydi Bloomberg.

Vengriya Tashqi ishlar vazirligi matbuot kotibi Mate Patsolay Bloomberg'ning veto haqidagi ma’lumotlarini rad etib, Budapesht haqiqatda Putinning hibsga olinishi haqidagi orderiga izoh berishni istamasligini aytdi.

«Haqiqat shuki, Vengriya Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrelga quyidagi pozitsiyani bildirdi: Vengriya XJS qarorini e’tiborga oladi va bu haqda hech qanday izoh berishni istamaydi. Ammo, agar oliy vakil yoki har qanday Yevropa Ittifoqi davlati bayonot bilan gapirishni istasa, Vengriya bunga e’tiroz bildirmaydi», dedi Patsolay.