YeI Rossiya neftiga nisbatan yangi sanksiyalarni tayyorlamoqda

Bu haqda Bloomberg agentligi o‘z manbalariga tayanib xabar berdi.

Ma’lum qilinishicha, 2025 yilda Yevroittifoq Rossiyaning Urals neft turiga nisbatan dinamik narx chegarasi mexanizmini joriy etgan. Unga ko‘ra, har olti oyda narx limiti bozordagi o‘rtacha narxdan 15 foiz past darajada avtomatik tarzda belgilanadi.

Hozirda mazkur chegara bir barrel uchun 44,1 dollar etib belgilangan. Uni qayta ko‘rib chiqish yoz oxiriga rejalashtirilgan. Yevropa kompaniyalariga belgilangan limitdan yuqori narxda sotilayotgan neft uchun sug‘urta va transport xizmatlarini ko‘rsatish taqiqlangan.

Bloomberg ma’lumotlariga ko‘ra, iyul oyidagi rejalashtirilgan qayta ko‘rib chiqish natijasida limit kamida 65 dollargacha ko‘tarilishi mumkin edi. Bu esa “Katta yettilik” (G7) mamlakatlari avval kelishib olgan 60 dollarlik chegaradan ham yuqori hisoblanadi.

Manbalarning aytishicha, Bryussel hozirda uchta asosiy variantni muhokama qilmoqda: amaldagi 44,1 dollarlik chegarani saqlab qolish, yil oxirigacha avtomatik oshirish mexanizmini muzlatib qo‘yish yoki har qanday oshirishni 60 dollardan yuqori bo‘lmagan darajada cheklash.

Kutilishicha, mazkur choralar Yevroittifoqning iyun oyi boshida taqdim etilishi rejalashtirilgan 21-sanksiyalar paketi tarkibiga kiritiladi.

Yangi paket doirasida Rossiyaga qarshi cheklovlarni chetlab o‘tishda yordam berayotgan uchinchi davlatlardagi banklar, neft treyderlari, neftni qayta ishlash korxonalari va kriptovaluta operatorlariga nisbatan ham sanksiyalar joriy etilishi mumkin.

Shuningdek, Rossiyaning “soya floti”ga mansub deb hisoblanayotgan taxminan 20 ta tankerga qarshi ham cheklovlar kiritilishi rejalashtirilmoqda. Keyinchalik bu choralar suyultirilgan tabiiy gaz tashuvchi kemalarga ham tatbiq qilinishi mumkin.

Neft narxlari esa AQSh va Eron o‘rtasida amalda bo‘lib turgan o‘t ochishni to‘xtatish rejimiga qaramay o‘sishda davom etmoqda.

26 may kuni iyul oyida yetkazib beriladigan Brent nefti fyucherslari 3,3 foizga qimmatlashib, bir barrel uchun 99,33 dollarga yetdi. Shu bilan birga, WTI nefti fyucherslari 92,79 dollar darajasida savdo qilindi.

Narxlarning o‘sishiga AQSh prezidenti Donald Trampning Eron bilan muzokaralar muvaffaqiyatsiz yakunlansa, yangi hujumlar bo‘lishi mumkinligi haqidagi bayonoti ham ta’sir ko‘rsatgan.

26 mayga o‘tar kechasi AQSh harbiylari Eron janubidagi bir qator nishonlarga, jumladan raketa uchirish maydonchalari va dengiz minalarini joylashtirishga uringan kemalarga zarba bergan.

AQSh Markaziy qo‘mondonligi bu harakatlar o‘zini himoya qilish va Eron kuchlaridan kelayotgan tahdidlarni bartaraf etish maqsadida amalga oshirilganini ma’lum qildi. Eron Islom inqilobi muhofizlari korpusi esa bunga javob choralari ko‘rilishidan ogohlantirgan.