12:30 / 24.03.2023
21844
Reklama

UzAuto Motors” yillik ishlab chiqarish hajmini oshirmoqchi

“UzAuto Motors” milliy kompaniyasi yillik avtomobil ishlab chiqarish hajmini milliontaga yetkazmoqchi. Bu bilan kompaniya MDH mamlakatlari ichida avtomobilsozlik sanoati yetakchisiga aylanadi. Bunda nafaqat kompaniyaning, balki, O‘zbekistondagi barcha tarmoqlarning katta mehnati aks etadi.

Foto: UzAuto Motors

“UzAuto Motors” kompaniyasi respublikada olib borilayotgan rivojlantirish strategiyasining amalga oshirilishi natijasida, ishlab chiqarishni kengaytirish va modernizatsiya qilish, ilm-fan va texnologiyani rivojlantirish, shuningdek, raqobatbardosh va yuqori texnologiyali mahsulot yaratish kabi ustuvor vazifalarni jamlagan avtomobilsozlik sanoati yangi bosqichga ko‘tarildi. 

Ishlab chiqarish jarayonlarining optimallashuvi hamda modernizatsiya qilinishi hisobiga, UzAuto Motors kompaniyasi tarixiy rekordni o‘rnatishga erishdi, ya’ni 2016 yildan buyon ishlab chiqarish hajmi 269% ga o‘sgan. Ishlab chiqarish jarayoniga yangi texnologiyalarning tatbiq etilishi, uskunalarning yangilanishi va kadrlar malakasining oshirilishi Markaziy Osiyoda yetakchi hisoblangan “UzAuto Motors” kompaniyasini MDHda ham yetakchiga aylantirdi. 

Foto: UzAuto Motors

 Bugun UzAuto Motors faqat eng zamonaviy avtomobillar, xususan, Chevrolet Tracker va Onix avtomobillarini ishlab chiqarishni yo‘lga qo‘ygan. Buning uchun 5 mingdan ortiq muhandis jalb qilingan bo‘lib, ularning bir qismini Toshkentdagi Turin politexnika universiteti bitiruvchilari tashkil etadi. O‘zbekistondagi mavjud 200 ta korxonaga xorijlik va mahalliy mutaxassislar jalb etilishi natijasida, ular ko‘magida Chevrolet Tracker va Onix avtomobillari uchun 1,5 ming dona detal ishlab chiqarish yo‘lga qo‘yildi.

Foto: UzAuto Motors

Qolaversa, O‘zbekistonda Chevrolet Tracker va Onix avtomobillarini ishlab chiqarishni tashkil etish maqsadida “O‘zavtosanoat” AJ tomonidan 12 ta yangi mahalliylashtirish loyihasi amalga oshirildi, jumladan, umumiy qiymati 312 million dollarlik yangi zavodlar va yuqori texnologiyali ishlab chiqarish liniyalari ishga tushirildi. Yangi ishlab chiqarish quvvatlarining ishga tushirilishi, 4,5 mingga yaqin yangi ish o‘rni yaratish imkonini beradi.

Yangi avtomobillar UzAuto Motors zavodida joriy qilingan Global Emerjing Markets (GEM) global platformasi asosida ishlab chiqarilgan bo‘lib, bu qo‘shimcha muhandislik yechimlarisiz bir necha turdagi avtomobillarni ishlab chiqarishni yo‘lga qo‘yish degani. Mazkur loyihani o‘zlashtirish uchun 427,6 million dollar miqdorida sarmoya kiritildi.

Foto: UzAuto Motors

Yuqori bosim ostida ishlovchi alyuminiy silindr bloklarini ishlab chiqarishda ilg‘or texnologiyadan foydalangan holda innovatsion dvigatellar oilasiga mansub CSS Prime dvigatellarini ishlab chiqarishni o‘zlashtirish UzAuto Motors Powertrain kompaniyasida noldan boshlab amalga oshirildi. Innovatsion texnologiyalar tufayli, O‘zbekistonda Chevrolet Onix va Tracker avtomobillarining mahalliylashtirish darajasini oshirishga xizmat qiluvchi MDHda yagona zavod ishga tushirildi.

 Andijon viloyatida ishga tushirilgan «Kova foundry» quyuv zavodida cho‘yan qismlar ishlab chiqarish yo‘lga qo‘yildi. Bu yerda yuqori qo‘shilgan qiymatli mahsulotlarning yangi turlarini o‘zlashtirish maqsadida, metallni qayta ishlashda muhim bo‘lgan barcha bosqichlar jumladan, eritish, quyish, qoliplash va yuqori aniqlikdagi mexanik ishlov berish jarayonida zaruriy bo‘lgan ilg‘or, so‘nggi rusumdagi texnika hamda texnologiyalar jalb etildi. Yiliga 18 ming tonna mahsulot ishlab chiqarish quvvatga ega korxonada, xomashyoning qo‘shilgan qiymatini 10 barobarga oshirib, ehtiyot qismlar importini 21 million dollarga qisqartirish imkoniyati mavjud.

 Mahalliylashtirish dasturi doirasida UzAuto tarmoq korxonalarida zamonaviy dvigatel sovitish tizimiga ega radiatorlar, Joyson Safety Systems avtomobilni boshqarish xususiyatiga ega ko‘p funksiyali rul chambaragi hamda xavfsizlik yostiqchasi, shuningdek, zamonaviy va noyob texnologiyalar asosida ishlovchi plastik baklarni ishlab chiqarish yo‘lga qo‘yildi. Bundan tashqari, “UzKoram-Co” MChJda Chevrolet Onix va Tracker avtomobillari uchun yon oynalarni ishlab chiqarish o‘zlashtirildi.

Foto: UzAuto Motors

Birinchi marta zamonaviy usulda shu jumladan, ekstruziya uslubini qo‘llagan holda, plastmassa va rezina qismlarni ishlab chiqarish va qayta ishlash yo‘lga qo‘yildi. Shuningdek, plastik qismlarni ultratovushli payvandlash va ikki komponentli plastmassalarni bosim ostida quyish joriy etildi, bu esa yuqori germetiklikka, zarba yoki tebranish yutilishining yuqori ko‘rsatkichlariga erishishga imkon beradi.

 Zavodning modernizatsiya qilinishi avtomobil kuzov qismlarini issiq shtamplash orqali ishlab chiqarish jarayonini ham o‘z ichiga oldi. UzSungwoo zavodida issiq shtamplash orqali to‘liq avtomatlashtirilgan metallni qayta ishlash sexining tashkil etilishi Chevrolet Tracker va Onix modellari uchun 20 turdagi mahalliy butlovchi qismlarni ishlab chiqarish evaziga, qariyb 214,5 milliard so‘mlik import o‘rnini bosish imkonini berdi. UzSungwoo korxonasiga o‘rnatilgan eng yangi texnologiyalardan foydalangan holda ishlab chiqilgan metallni issiq qayta ishlash liniyasi yetakchi jahon yetkazib beruvchilarining metallni kesish, issiq presslash va lazer bilan kesish uskunalari bilan jihozlangan bo‘lib, 2,4 million dona metall buyumlar ishlab chiqarish imkonini beradi hamda zaruriy uskunalarni 5 martagacha kamaytirish evaziga investitsiyalarni tejash imkonini beradi. 

Foto: UzAuto Motors

Innovatsion ishlab chiqarish texnologiyalarining joriy etilishi bevosita Asakadagi UzAuto Motors zavodining ishlab chiqarish quvvatlariga ham ta’sir ko‘rsatdi. Asosiy ishlab chiqarish bo‘linmalariga qo‘shimcha ravishda kompaniya, boshqa payvandlash usullari bilan solishtirganda, ishlab chiqarish jarayonida yuqori aniqlik, korroziyaga chidamlilik va payvandlash choki, shuningdek, estetik, energiya tejashning yuqori darajasiga va ishlab chiqarishda atrof-muhitni muhofaza qilishga qaratilgan lazerli payvandlash jarayonini yo‘lga qo‘ydi.

 Amalga oshirilgan loyihalar O‘zbekistonda avtomobilsozlikni yanada rivojlantirish va avtomobil ishlab chiqarish hajmini yiliga 500 ming donaga, kelgusida esa million donaga yetkazish uchun barcha sharoit va imkoniyatlar mavjud ekanini anglatadi.

Reklama

Top