FT: Xitoy hozircha AQSh davlat kotibini qabul qilishga tayyor emas

Xitoy Federal tergov byurosi (FTB) fevral oyida urib tushirilgan XXR «razvedka shari» haqidagi hisobotni e’lon qilishidan xavotirda, shuning uchun AQSh davlat kotibi Entoni Blinkenni Pekinda qabul qilishga tayyor emas. Bu haqda 15 aprel, shanba kuni to‘rt manbaga tayanib, Financial Times (FT) xabar berdi. Tashrif dastlab Amerika tomonining tashabbusi bilan havo shari topilganidan ko‘p o‘tmay bekor qilingan edi.

Xitoy rasmiylari AQSh prezidenti Jo Bayden ma’muriyati FTB hisobotini e’lon qilishi, shuningdek, bir qator ashyoviy dalillar taqdim etishi va Blinkenning Xitoyga safari chog‘ida xulosalar ommaga e’lon qilinishi mumkinligidan xavotirda, deb yozadi gazeta. Shu munosabat bilan Pekin ehtimoliy sanalarni kelishib olishga shoshilmayapti.

Xitoy tashqi ishlar vaziri Tsin Gan mart oyida Pekinda bo‘lib o‘tgan Xitoy taraqqiyot forumida AQSh delegatsiyasining muammosini aytib o‘tdi, dedi uch kishi FT'ga. Tsinning aytishicha, FTB tergovi AQSh-Xitoy munosabatlarini barqarorlashtirishni qiyinlashtiradigan muammodir, dedi manbalardan biri. Qo‘shma Shtatlar inqirozga Xitoyning harakatlari sabab bo‘lgan deb hisoblaydi.

Federal tergov byurosi va Oq uy Milliy xavfsizlik kengashi hozircha tergov ma’lum qilinishi masalasini ochiqlamagan. Bu masala Bayden ma’muriyati ichida ziddiyatga sabab bo‘lyapti. Bir qator amaldorlar havo shari razvedka ma’lumotlarini yig‘ayotganini tasdiqlash uchun dalillarni oshkor qilmoqchi. Nashr qo‘shimcha qilishicha, AQSh Kongressi ham FTB xulosalarini e’lon qilish talabini qo‘yishi mumkin.