Fransiyada pensiya islohotiga qarshi yana namoyishlar bo‘lib o‘tdi

Fransiyaning qator shaharlarida 17 aprel, dushanba kuni prezident Emmanuel Makronning pensiya islohotiga qarshi ommaviy namoyishlar chog‘ida namoyishchilar va politsiya o‘rtasida tartibsizliklar va to‘qnashuvlar bo‘lib o‘tdi.

Aksiyalar Parij, Lion, Bordo, Marsel, Renn va Fransiyaning boshqa shaharlarida bo‘lib o‘tdi. Le Figaro gazetasining yozishicha, Lionda namoyishchilar petarda yoqqan, Rennda politsiya namoyishchilarni markazdan uzoqlashtirish uchun ko‘zdan yosh oqizuvchi gaz va suv purkagichlardan foydalanishga majbur bo‘lgan.

Ayni paytda, Bordo prefekturasi namoyishchilar tomonidan, jumladan, politsiya bo‘limi oldida va LCL banki oldida o‘ttizta chiqindi qutisi yoqib yuborilgani haqida xabar berdi. Qora kiyimdagi namoyishchilar bilan to‘qnashuvlar chog‘ida politsiya ko‘zdan yosh oqizuvchi gaz ishlatgan.

Parijda, Le Figaro nashrining yozishicha, 17 aprel oqshomiga qadar 11 kishi qo‘lga olingan.

Shu kuni, 17 aprelda Fransiya prezidenti Emmanuel Makron televideniye orqali chiqish qilib, mamlakatni birlashtirish uchun «100 kunlik dastur»ni amalga oshirish niyatida ekanligini ma’lum qildi. Ushbu dastur doirasida Fransiya bosh vaziri Elizabet Born mehnat sharoitlari, xavfsizlik, ta’lim va sog‘liqni saqlash bo‘yicha takliflar tayyorlashi kerak, dedi u. Makronning so‘zlariga ko‘ra, bu ishning natijasini 14 iyulda nishonlanadigan milliy bayram – Bastiliyani olish kuni ko‘rishi kerak.

Avvalroq Fransiya prezidenti Emmanuel Makron pensiya yoshini oshirish bo‘yicha bahsli qonun loyihasini imzoladi. Bu haqda Fransiya hukumati 15 aprel kuni xabar berdi. Pensiya yoshini 62 dan 64 ga ko‘taruvchi islohot bir necha oylik shiddatli ommaviy noroziliklarga sabab bo‘ldi.

Fransiya Konstitutsiyaviy sudi bir kun avval Makron tashabbusi bo‘lgan pensiya islohoti, qonunning bir qator moddalaridagi huquqiy xatolarga qaramay, qonuniy ekanligini e’lon qildi. Pensiya yoshini ikki yilga oshirish to‘g‘risidagi bandning o‘zi ham sudyalar shikoyatiga sabab bo‘lmadi. Konstitutsiyaviy sud muxolifatning pensiya islohoti bo‘yicha referendum o‘tkazish haqidagi iltimosini rad etdi. 

Fransiya bosh vaziri Elizabet Born konstitutsiyadagi bo‘shliqdan foydalanib, munozarali pensiya islohoti loyihasini parlamentda ovoz berishsiz qabul qildi. Milliy assambleyada uning hukumati ishonchsizlik votumiga bardosh bera oldi.