Украина ҳарбий-ҳаво кучлари Киевга ҳужум қилган Россиянинг барча дронлари уриб туширилганини маълум қилди. Одесса томон отилган ракеталар нишонларга қисман тегди.
8 май, душанбага ўтар кечаси Россия Эронда ишлаб чиқарилган Shahed-136/131 камикадзе-дронлари билан Киев ва Одесса вилоятларига ҳаводан ҳужум қилди, деб хабар берди Украина ҳарбий-ҳаво кучлари. Хабарда айтилишича, Киевга ҳужум қилган 35 та УУАнинг барчаси ҳаво ҳужумидан мудофаа тизимлари томонидан уриб туширилган.
Украина ҳарбийларига кўра, Россия қўшинлари Киевга шимолий йўналишдан – Брянск вилоятидаги Сешча аэродромидан ҳужум қилган. Маъмурият раҳбари Сергей Попко сўзларига кўра, Киевда беш нафар фуқароси жабрланган, шаҳарда автомобиллар ва деразалар шикастланган.
Украина Ҳарбий-ҳаво кучларининг хабарида, шунингдек, Россиянинг узоқ масофали Ту-23М3 бомбардимончи самолётлари Қримдаги Тарханкут бурни ҳудудидан саккиз марта ракета учирганлиги айтилади. Украина ҳарбийларининг аниқлик киритишича, «ракеталарнинг бир қисми нишонга тегмаган».
Одесса вилояти ҳарбий маъмурияти спикери Сергей Братчукнинг Telegram-каналида Одесса вилоятидаги вайронагарчилик тасвирлари эълон қилинди.
8 майга ўтар кечаси Винница, Кировоҳрад, Черниҳив, Полтава, Миколайив, Днипропетровск вилоятлари ва Херсон вилоятининг Украина назоратидаги қисмида ҳам ҳаво тревогаси эълон қилинди.
