Rossiya tunda Kiyev va Odessaga havo hujumlarini amalga oshirdi

Ukraina harbiy-havo kuchlari Kiyevga hujum qilgan Rossiyaning barcha dronlari urib tushirilganini ma’lum qildi. Odessa tomon otilgan raketalar nishonlarga qisman tegdi.

Foto: Reuters

8 may, dushanbaga o‘tar kechasi Rossiya Eronda ishlab chiqarilgan Shahed-136/131 kamikadze-dronlari bilan Kiyev va Odessa viloyatlariga havodan hujum qildi, deb xabar berdi Ukraina harbiy-havo kuchlari. Xabarda aytilishicha, Kiyevga hujum qilgan 35 ta UUAning barchasi havo hujumidan mudofaa tizimlari tomonidan urib tushirilgan.

Ukraina harbiylariga ko‘ra, Rossiya qo‘shinlari Kiyevga shimoliy yo‘nalishdan – Bryansk viloyatidagi Seshcha aerodromidan hujum qilgan. Ma’muriyat rahbari Sergey Popko so‘zlariga ko‘ra, Kiyevda besh nafar fuqarosi jabrlangan, shaharda avtomobillar va derazalar shikastlangan.

Ukraina Harbiy-havo kuchlarining xabarida, shuningdek, Rossiyaning uzoq masofali Tu-23M3 bombardimonchi samolyotlari Qrimdagi Tarxankut burni hududidan sakkiz marta raketa uchirganligi aytiladi. Ukraina harbiylarining aniqlik kiritishicha, «raketalarning bir qismi nishonga tegmagan».

Odessa viloyati harbiy ma’muriyati spikeri Sergey Bratchukning Telegram-kanalida Odessa viloyatidagi vayronagarchilik tasvirlari e’lon qilindi.

8 mayga o‘tar kechasi Vinnitsa, Kirovohrad, Chernihiv, Poltava, Mikolayiv, Dnipropetrovsk viloyatlari va Xerson viloyatining Ukraina nazoratidagi qismida ham havo trevogasi e’lon qilindi.

Tayyorlagan: Отабек Матназаров

#Kiyev #Rossiya