Ukraina urushda vayron bo‘lgan uylarni tiklash dasturini ishga tushirdi

Qurilish materiallari yoki ta’mirlash xizmatlariga buyurtma berish uchun fuqarolar 200 ming grivnagacha olishi mumkin.

Foto: UNIAN

10 may kuni Ukrainada urush oqibatida vayron bo‘lgan uylarni tiklashga ko‘maklashuvchi «eVіdnovlennya» dasturi ishga tushirildi.

Fuqarolar «Diya» mobil ilovasi orqali ariza topshirishi va qurilish materiallari yoki ta’mirlash xizmatlariga buyurtma berish uchun 200 ming grivnagacha (taxminan 61 mln so‘m) moddiy yordam olishi mumkin.

Qayd qilinishicha, avvalo, Rossiya qurolli tajovuzi, harbiy harakatlar, terroristik harakatlar, sabotaj oqibatida unchalik katta zarar ko‘rmagan uy-joy (kvartira, xususiy uy, boshqa turar-joy binolari) mulkdorlari yoki sheriklari bo‘lgan barcha fuqarolar yordam oladi. Dastlabki 2 kun davomida dasturga 5 mingdan ortiq ariza kelib tushgan.

Ukraina prezidenti Volodimir Zelenskiy dasturni olqishlab, nafaqat uyi buzilganlar, balki vayron bo‘lgan uy-joylarini mustaqil ravishda tiklab olganlarga ham yordam berilishi kerakligini ta’kidladi.

«Yordamda tenglik tamoyili juda muhim va tegishli algoritm kerak. Keyingi qadam - yo‘qotilgan uy-joy uchun kompensatsiya. Bu ham amalga oshadi», deb qo‘shimcha qildi Ukraina rahbari.

Bosh vazir Denis Shmigal bu dastur orqali Ukrainani tiklash tez va samarali amalga oshishini ta’kidladi. Shuningdek, hukumat o‘z kuchi bilan uy-joylarini tiklab olganlarga ham yordam ko‘rsatish ustida ishlayotganini aytdi.

#Ukraina #moddiy yordam