G7 va YeI Rossiyadan gaz importi tiklanishi bo‘yicha embargoni muhokama qilyapti

“Yettilik guruhi”ga (G7) a’zo davlatlar va Yevropa Ittifoqi o‘n birinchi sanksiyalar paketi doirasida Moskva avvalroq yetkazib berishni to‘xtatib qo‘ygan yo‘nalishlar bo‘yicha Rossiyadan gaz importini qayta tiklashga nisbatan embargo joriy etishni muhokama qilmoqda. Bu haqda 14 may, yakshanba kuni muzokaralarda ishtirok etgan rasmiylarga tayanib, Financial Times (FT) xabar berdi.

Qaror 19 may kuni Xirosimada bo‘lib o‘tadigan "Katta yettilik" sammiti yakunida tasdiqlanishi kerak.

Agar ma’qullansa, bu chora o‘tgan yili Rossiya yetkazib berishni to‘xtatgan Polsha va Germaniya kabi mamlakatlarga quvurlar orqali Rossiya gazi eksportini qayta tiklashning oldini oladi, deydi FT.

G‘arb Rossiya energiya tashuvchilarni sotishdan tushgan daromadni ko‘paytirmasligini ta’minlamoqchi, gap Rossiyaning Ukrainaga keng ko‘lamli bostirib kirishidan 15 oy o‘tgach, Moskvaga iqtisodiy bosimni kuchaytirish haqida ketyapti.

Nashr suhbatdoshiga ko‘ra, “hamkorlar kelajakda o‘z fikrini o‘zgartirmasligiga ishonch hosil qilish” uchun qadam tashlash kerak.

Yevropa Ittifoqi diplomatlaridan birining aytishicha, bu taklif Bryusseldan status-kvo qanday o‘zgarishini aniqlash uchun qo‘shimcha tushuntirishlarni talab qiladi. "Uning qanday ishlashi aniq bo‘lishi kerak", dedi manba.