Turkiya Kosovoga tinchlikparvar kuchlarini yuboradi

NATO so‘roviga ko‘ra turk tinchlikparvar kuchlari 4 va 5 iyun kunlari Kosovoga yuboriladi, deb xabar qildi Anqaradagi Mudofaa vazirligi. Kosovo shimolidagi tartibsizliklar chog‘ida o‘nlab serblar va KFOR tinchlikparvar kuchlari vakillari yaralangan.

Turkiya NATOning KFOR xalqaro tinchlikparvar kontingentiga qo‘shilish haqidagi tegishli iltimosini qondirgan holda Kosovoga tinchlikparvar qo‘shinlarini yuboradi. Kosovo shimolidagi tartibsizliklar munosabati bilan tinchlikparvar kuchlar 4 va 5 iyun kunlari yuboriladi, bu haqda 3 iyun, shanba kuni Anqaradagi Mudofaa vazirligi ma’lum qildi. 

Idora mintaqadagi xavfsizlik va barqarorlikka zarar yetkazishi mumkin bo‘lgan inqirozni bartaraf etish uchun vazmin va konstruktiv muloqotga chaqirdi. 
 
29 may kuni Kosovoning Zvechan shahrida namoyishchilar KFOR kuchlari bilan to‘qnashgan. Tartibsizliklarda kamida 50 nafar namoyishchi va KFOR’ning 41 nafar xodimi jarohatlangan. Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel Yevropa Ittifoqi Zvechandagi «hayratlanarli zo‘ravonlik»ni keskin qoralashi haqida ma’lum qildi. «Yevropa Ittifoqi Kosovo hukumati va namoyishchilarni vaziyatni zudlik bilan va so‘zsiz yumshatishga chaqiradi. Biz tomonlardan mas’uliyat bilan harakat qilishlarini va muloqot orqali zudlik bilan siyosiy yechim topishlarini kutamiz», deb yozadi Borrel. 

Shunga qaramay, Kosovo shimolida serb namoyishchilarining noroziliklari davom etdi. Namoyishchilar Kosovo xavfsizlik kuchlarini mintaqadan olib chiqib ketishni va etnik alban aholiga mansub merlarni ishdan bo‘shatishni talab qilmoqda.