Kosovoda bosh vazir partiyasi saylovlarda g‘alaba qozondi

Rasmiy ma’lumotlarga ko‘ra, byulletenlarning 99,4 foizi sanab chiqilganidan so‘ng Albin Kurti boshchiligidagi siyosiy kuch 43 foiz ovoz to‘plagan.

Ikkinchi o‘rinni 21 foiz ovoz bilan Kosovo Demokratik partiyasi egallagan bo‘lsa, Kosovo Demokratik ligasi 18 foiz natija bilan uchinchi bo‘ldi. «Kosovo kelajagi uchun alyans» esa qariyb 7 foiz ovoz to‘pladi.

Saylovlarda ishtirok etish darajasi 37 foizdan sal kamroqni tashkil qildi.

Bu Kosovoda so‘nggi bir yarim yil ichida o‘tkazilgan uchinchi parlament saylovidir. Mutaxassislar fikricha, mamlakatda kuzatilayotgan siyosiy beqarorlik va partiyalar o‘rtasidagi kelishmovchiliklar hukumat shakllantirish jarayonini murakkablashtirmoqda.

Albin Kurti partiyasi saylovda birinchi o‘rinni olgan bo‘lsa-da, parlamentda mustaqil ko‘pchilikni ta’minlash uchun yetarli o‘rinlarga ega emas. Shu sababli hukumat tuzish uchun boshqa siyosiy kuchlar bilan koalitsiya tuzishga to‘g‘ri keladi.

Eslatib o‘tamiz, 2025 yil dekabr oyida bo‘lib o‘tgan avvalgi saylovlarda ham «O‘z taqdirini o‘zi belgilash» partiyasi 51,1 foiz ovoz bilan g‘olib chiqqan edi. Biroq joriy yil aprel oyida parlament tarqatib yuborildi. Bunga siyosiy kuchlarning mamlakat prezidenti lavozimiga nomzod bo‘yicha kelisha olmagani sabab bo‘lgan.

Kosovo prezidenti asosan ramziy va vakillik vakolatlariga ega bo‘lsa-da, mazkur masala mamlakatdagi siyosiy inqirozni yanada chuqurlashtirgan.

Reuters agentligi qayd etishicha, Albin Kurti va uning partiyasi g‘arbga yaqin siyosat yuritadi. Kosovo Yevropa Ittifoqiga a’zo bo‘lishni strategik maqsad sifatida belgilagan. Bryussel esa Prishtinadan barqaror davlat institutlarini shakllantirish va islohotlarni jadallashtirishni talab qilmoqda.

51 yoshli Albin Kurti Kosovoning shimolida yashovchi serb ozchiligiga nisbatan qat’iy siyosat yuritishi bilan ham tanilgan. U hukumat nazoratini serblar ko‘pchilikni tashkil etuvchi hududlarga kengaytirish tarafdori hisoblanadi.

Ma’lumki, Kosovo 2008 yilda Serbiyadan mustaqilligini e’lon qilgan. Biroq Serbiya, Rossiya hamda Yevropa Ittifoqining ayrim davlatlari — Ispaniya, Gretsiya, Kipr, Slovakiya va Ruminiya Kosovo mustaqilligini hanuzgacha tan olmagan.