NATO yetakchilari Yyens Stoltenbergning bosh kotiblik muddatini uzaytirish tarafdori bo‘lib, o‘rinbosar tanlash borasida kelishmovchiliklar yuzaga kelgan. Bu haqda Financial Times xabar bermoqda.
Nashr manbalarining qayd etishicha, Stoltenbergdan bu lavozimga NATOning barcha a’zolarini qoniqtiradigan nomzodni topishdagi qiyinchiliklar tufayli 2024 yilgacha bosh kotib bo‘lib qolish so‘ralishi mumkin. Biroq, bu «qisqa muddatli murosa» bo‘lishi ta’kidlangan.
«Stoltenberg ajoyib bosh kotib bo‘ldi va men hozir qayiqni silkitishdan ma’no ko‘rmayapman», dedi ismini oshkor qilmaslik sharti bilan NATO davlatlaridan birining tashqi ishlar vaziri.
Diplomatlarning fikriga ko‘ra, Stoltenberg bunga rozi bo‘ladi, chunki u «vazifaga mas’uliyat bilan qaraydigan odam» va bu «davomiylik uchun mantiqiy bo‘lardi».
Amaldagi bosh kotib vakolatini uzaytirish taklifi Daniya bosh vaziri Mette Frederiksen va Buyuk Britaniya mudofaa vaziri Ben Uollesning nomzodlari bir ovozdan qo‘llab-quvvatlanmaganidan keyin yangragan.
Stoltenbergning NATO bosh kotibi sifatidagi vakolati 2023 yil oktyabr oyida tugaydi. U qariyb to‘qqiz yil davomida bosh kotib bo‘lib ishlayapti.
