Toshkent viloyatida 18 yoshli yigit ariqda oqib ketayotgan qizchani qutqarib qoldi

20 iyun kuni Toshkent viloyati Qibray tumanida 18 yoshli yigit ariqda oqib ketayotgan qizchani qutqarib qoldi, deya xabar bermoqda tuman hokimligi matbuot xizmati.

Qiz yashaydigan xonadon hovlisidan katta ariq oqib o‘tgan. Qizcha ariq bo‘yida o‘ynab, suvga tushib ketgan va hushsiz holda taxminan 200 metr masofaga oqib borganida yo‘ldan o‘tib ketayotgan 18 yoshli yigit uni qutqarib qolgan.

«Ariqqa qarab ketayotgandim, qizni ko‘rib, zudlik bilan suvga tushib, uni olib chiqdim. Orqasini o‘girib, belini ishqaladim va ichidagi suvini chiqarib tashladim. Shundan so‘ng, qizni shifoxonaga olib bordik», deydi qizaloqni qutqarib qolgan yigit.

Qizning otasining aytishicha, u uyida ish qilayotgani sabab qizi suvga tushib ketganini bilmay qolgan.

«Qarasam, qizim yo‘q. Ariq bo‘yiga yugurib borib, ko‘rsam beton ho‘l ekan. Shundan ariqqa tushib ketganini tushundim. Yetib kelgunimcha, qo‘shni bola qutqarib qolibdi. Rahmat shu mahalladagilarga. Shifoxonaga olib borib, ikki soatlik shifokor ko‘rigidan so‘ng, qizim o‘ynab-kulib chiqib keldi», — deydi qizning otasi.

Qizni qutqarib qolgan Yusufbek Tojiboyevga tuman FVB xodimlari tomonidan tashakkurnoma va sovg‘a topshirilgan.