Kardiolog telefonda ko‘p gaplashish xavfi haqida ogohlantirdi

Mobil telefondan tez-tez foydalanish yurak-qon tomir patologiyalarini, xususan, gipertoniya deb ataladigan arterial gipertenziyani rivojlanish xavfini oshiradi. Bu haqda kardiolog va tibbiyot fanlari nomzodi Kseniya Yeruslanova gapirib berdi. 

Shifokor so‘zlariga ko‘ra, umumiy qo‘ng‘iroqlar vaqti haftasiga 30 daqiqadan oshsa, gipertenziya rivojlanish xavfi yuzaga keladi. Ushbu parametr qanchalik yuqori bo‘lsa, patologiya xavfi shunchalik yuqori bo‘ladi. 

«Bu sutkasiga 24 soat davomida aloqada qolishga urinadigan odamlar yo‘liqadigan stress bilan bog‘liq. Ma’lumki, stress yurak-qon tomir kasalliklari rivojlanishining hal qiluvchi xavf omillaridan biridir», dedi kardiolog. 

Uning so‘zlariga ko‘ra, ish joyida mobil telefonlardan tez-tez foydalanadigan odamlar ish va shaxsiy hayot o‘rtasidagi chegarani yo‘q qiladi. Bu, o‘z navbatida, doimiy tashvish va stressga olib keladi. Telefon suhbatlarining salbiy ta’sirini kamaytirish uchun Yeruslanova vaqtni nazorat qilishni tavsiya etdi. 

«O‘zingiz uchun mobil telefonsiz «tinchlik soati»ni joriy qiling. Masalan, ovqatlanish paytida yoki dam olish paytida. Kechasi siz «bezovta qilinmasin» rejimini o‘rnatishingiz mumkin, keyin kiruvchi qo‘ng‘iroqlar yoki xabarlar haqidagi bildirishnomalar ekranda ko‘rinmaydi», dedi u. 

Kardiolog tavsiyasiga ko‘ra, zarurat bo‘lmasa smartfonni qo‘lga olmaslik lozim. Bo‘sh vaqtni jismoniy faoliyatga, sayrga yoki sevimli mashg‘ulotlarga bag‘ishlagan ma’qul.