Shavkat Mirziyoyev: Toshkent viloyatining 3 hududini poytaxt bilan bog‘lovchi elektropoyezdlar harakati yo‘lga qo‘yiladi

“Bugungi kunda Toshkent viloyatida bundan 30-40 yil oldin olib kelingan 4 ta elektropoyezd harakatlanmoqda. Shu bois, odamlarimizning uzog‘ini yaqin qilish, ularga ko‘rsatiladigan xizmatlar sifatini oshirish maqsadida elektropoyezdlar to‘liq yangilanadi.

Jumladan, 2024 yildan Bekobod, Xo‘jakent va Angren yo‘nalishlarini poytaxt bilan bog‘laydigan 10 ta elektropoyezd harakati yo‘lga qo‘yiladi”, dedi nomzod.

Muqobil energiyaga oid dasturga ko‘ra, sanoat korxonalarini barqaror energiya bilan ta’minlash uchun Saudiya Arabistoni va Xitoy investorlari ishtirokida 1,5 milliard dollar sarmoya hisobiga Qibray, Yuqori Chirchiq va Bo‘kada jami 1,7 ming megavattli 3 ta quyosh stansiyasi ishga tushiriladi.

Shu bilan birga, Angren issiqlik energiya stansiyasida 600 megavattli 2 ta ko‘mirli energoblok, Bo‘stonliq tumanida 900 megavattli GESlar barpo etiladi.

Mirziyoyevga ko‘ra, kelgusi yetti yilda:

• Toshkent viloyatining barcha mahallalarida bog‘cha va maktab muammosi to‘liq hal qilinadi. Buning uchun qo‘shimcha 60 ming o‘rinli 1 mingdan ziyod bog‘chalar faoliyati yo‘lga qo‘yiladi;
• mavjud maktablar quvvatini oshirish va yangilarini qurish hisobiga, 100 ming o‘quvchi o‘rni yaratiladi va 35 nafardan ko‘p bola ta’lim oladigan sinf qolmaydi (hozirda bunday sinflar soni 3 mingta);
• viloyatdagi 188 ta maktabga sport zallari qurib beriladi.

Shuningdek, viloyatdagi 350 dan ziyod mahallada 4 ming kilometr ichki yo‘llar va 100 dan ziyod ko‘priklar quriladi hamda ta’mirlanadi.

“Uzunligi 5100 kilometr bo‘lgan elektr tarmoqlari va 1400 ta transformator yangilanadi. Buning hisobiga, 250 ming aholi xonadonida elektr ta’minoti yaxshilanadi.

Bundan tashqari, 5200 kilometr ichimlik suvi tarmog‘i, 750 kilometr oqova tarmoqlarini qurish va ta’mirlash ishlari amalga oshiriladi.

Natijada, 100 ming aholi yashaydigan xonadonlarga ilk bor markazlashgan tarmoqlar orqali ichimlik suvi kirib boradi, 800 ming aholining suv ta’minoti yaxshilanadi”, dedi nomzod.