O‘zbekiston va Shveytsariya ta’lim sohasida hamkorlikni kengaytirishga tayyorligini tasdiqladi

«Qadrli hamkasbim, Shveytsariya tashqi ishlar vaziri Ignasio Kassis janobi oliylari bilan uchrashishdan mamnun bo‘ldik», - deb yozdi O‘zbekiston TIV rahbari o‘zining Telegram-kanalida. 

Ma’lum qilinishicha, tashqi siyosat idoralari rahbarlari siyosatdan tortib turizmgacha bo‘lgan keng qamrovli ikki tomonlama munosabatlarning kun tartibini muhokama qildi, O‘zbekiston va Shveytsariya Tashqi ishlar vazirliklari oldiga aloqalarni mustahkamlashga qaratilgan ustuvor vazifalarni belgilab oldi. 

«O‘zbekistonning ko‘p asrlik tarixiga qiziqishi, mamlakatimizning barqaror rivojlanishi yo‘lidagi islohotlarni doimiy qo‘llab-quvvatlashi, ta’lim, sog‘liqni saqlash, yashil texnologiyalar, savdo va boshqa sohalardagi hamkorlikni kengaytirishga tayyorligi uchun vazir janoblariga samimiy minnatdorchiligimizni bildiramiz», deydi Baxtiyor Saidov.

Shveytsariya tashqi ishlar vaziri Ignasio Kassis 5 iyul kuni tashrif bilan O‘zbekistonga kelgan edi. Uning safari Samarqand viloyatidagi ikki tomonlama hamkorlik obektlariga tashrif bilan boshlandi. Toshkentda Shveytsariya delegatsiyasi O‘zbekiston hukumati, vazirlik va idoralarida ikki tomonlama uchrashuv hamda muzokaralar o‘tkazdi.