Bir yilda 180 kunni jazo kamerasida o‘tkazgan Aleksey Navalniy yana JIZOga jo‘natildi - 4 avgustga qadar. «Ekstremistik» ishi bo‘yicha hukm e’lon qilinishi shu kunga belgilangan.
Vladimirdagi 6-sonli koloniyada jazo muddatini o‘tayotgan muxolifatchi siyosatchi Aleksey Navalniy 17-marta jazo kamerasiga (JIZO) jo‘natildi, dedi uning advokati Vadim Kobzev 21 iyul, juma kuni. «Bir soat oldin Aleksey Navalniy yana jazo kamerasiga joylashtirildi. U o‘zini noto‘g‘ri tanishtirgan. 13 sutkaga. Aynan hukm e’lon qilingan kungacha», - deb yozadi Kobzev. Navalniy JIZOda 4 avgustgacha qoladi - shu kuni unga «ekstremizm» ishi bo‘yicha hukm e’lon qilinishi rejalashtirilgan.
Siyosatchi muntazam ravishda turli bahonalar bilan uzoq muddatga JIZOga yuborilyapti. Umuman olganda, 2022 yilning yozida u ko‘chirilgan Melixovodagi koloniyada siyosatchi 180 kunni JIZOda o‘tkazdi va yana 13 kunni o‘tkazadi.
Kuni kecha ommaviy axborot vositalari va jamoatchilik uchun yopiq bo‘lgan sud jarayoni yakuniga ko‘ra, prokuratura Navalniyni «ekstremizm» ishi bo‘yicha 20 yilga maxsus rejimli koloniyaga ozodlikdan mahrum qilishni so‘ragani ma’lum bo‘ldi.
Siyosatchi Rossiya Jinoyat kodeksining 6ta moddasi bo‘yicha ayblanmoqda: ekstremizmga da’vat qilish, fuqarolarning huquqlarini buzuvchi tashkilot yaratish, ekstremizmni moliyalashtirish, ekstremistik jamiyatni yaratish, voyaga yetmaganlarni xavfli harakatlarga jalb qilish va natsizmni oqlash.
Maxsus rejimdagi koloniyalarda qamoqda saqlashning eng qattiq sharoitlari mavjud. Qonunga ko‘ra, unda jinoyatni o‘ta xavfli takror sodir etganlikda ayblangan, umrbod ozodlikdan mahrum qilish jazosiga hukm qilingan, shuningdek, o‘lim jazosi afv etish tartibida muayyan muddatga almashtirilgan mahkumlar jazoni o‘taydi.
