Abduqodir Husanov «Lans» futbolchisiga aylandi

O‘FA va «Energetik-BGU» klubi O‘zbekiston milliy jamoasi va Belarus klubi himoyachisining «Lans» klubi a’zosiga aylanganini tasdiqladi. Championat.asia sayti ma’lumotiga ko‘ra, Abduqodir Husanov tibbiy ko‘rikdan o‘tgach, «Lans» klubi bilan 4 yillik shartnoma tuzgan. O‘zbekistonlik himoyachi fransuz klubida 25-raqam ostida o‘ynaydi.

Lansliklar yakunlangan mavsum Fransiya chempionatida «PSJ»dan (85) bir ochko kam (84) jamg‘arib, 2-o‘rinni egallagan holda yangi mavsumdan Yevropa Chempionlar ligasida ishtirok etadi.

Avvalroq, O‘zbekiston yoshlar jamoasi (U20) safida Osiyo chempioni bo‘lgan va Argentinadagi yoshlar o‘rtasidagi JCh-2023da ishtirok etgan Abduqodir Husanovning o‘yinlari yevropalik skautlar tomonidan kuzatilgani haqida xabarlar tarqalgandi.

Ma’lumot uchun, Husanov joriy mavsum Minsk klubi safida 8 o‘yinda bitta golga mualliflik qilgan. Shuningdek, u O‘zbekiston milliy jamoasi safida CAFA Nations Cup-2023 bahslarida debyutini o‘tkazdi.

Eslatib o‘tamiz, hozirgacha Yevropa kuchli beshlik chempionatlaridagi o‘zbekistonlik yagona futbolchi Eldor Shomurodov edi. Husanov bu borada ikkinchi o‘yinchiga aylandi.