10:21 / 03.08.2023
10322

Эрдўған Россияни Қора денгиздаги вазиятни кескинлаштирмасликка чақирди

Қора денгизда Киев ва Москва ўртасидаги можаро фонида Туркия президенти Эрдўған Путин билан телефон суҳбатида «ғалла битими»ни тинчлик кўприги деб атади.

Фото: Reuters

Туркия президенти Ражаб Тоййиб Эрдўған 2 август, чоршанба куни Россия раҳбари Владимир Путинни Қора денгизда Россия ва Украина ўртасидаги можаронинг ҳар қандай кескинлашувига йўл қўймасликка чақирди. Эрдўған Россия президенти билан телефон орқали суҳбатда ҳозирги кескин вазиятнинг кучайишига олиб келадиган ҳар қандай қадамлардан воз кечиш зарурлигини таъкидлади, дея хабар беради Туркия президенти матбуот хизмати. Шу билан бирга, Эрдўған Қора денгиз дон ташаббусининг муҳимлигини таъкидлаб, уни тинчлик кўприги деб атади.

Кремл матбуот хизмати хабарига кўра, Путин Эрдўған билан суҳбатда Қора денгиз портларидан Украина ғалласини экспорт қилиш бўйича «пакет» келишувларининг бекор қилиниши ва Россиядан озиқ-овқат ва ўғитлар етказиб берилиши блоклангани муносабати билан «Россиянинг принципиал позициясини билдирган». «Таъкидланганидек, «ғалла битими»нинг Россия қисмини амалга оширишда муваффақиятга эришилмагани сабабли унинг навбатдаги узайтирилиши ўз маъносини йўқотди. Ғарб барча талабларни амалда бажариши биланоқ Истанбул келишувларига қайтишга тайёрлик тасдиқланди. Улар Россия олдида маълум бир мажбуриятларга эга», дейилади хабарда.

2022 йил 22 июлда имзоланган Қора денгиз ғалла ташаббуси БМТ, Туркия, Россия ва Украина ўртасида Украина донини Қора денгиз учта порти: Черноморск, Одесса ва Южний орқали хавфсиз экспорт қилиш учун денгиз йўлакларини яратиш бўйича келишувдир.

Шартноманинг иккинчи қисми Россия озиқ-овқат ва ўғитларини экспорт қилиш йўлидаги тўсиқларни олиб ташлашни назарда тутади. Москва келишувнинг бу қисми амалга оширилмаётганидан бир неча бор норозилигини билдирган. 17 июлда «ғалла битими» тугаганидан кейин РФ Россияга тегишли келишувлар бажарилмагунча унда иштирок этишдан воз кечди. 

Эрдўғоннинг матбуот хизмати 2 август куни таъкидлашича, Туркия президенти Қора денгиз дон ташаббусининг яна кучга кириши учун саъй-ҳаракатларни амалга ошириш ниятида. 

Top