AQSh va Kanada Belarusga qarshi sanksiyalarni kengaytirdi

AQSh va Kanada Belarusga qarshi sanksiyalarni mamlakatdagi prezidentlik saylovlarining uch yilligi munosabati bilan uzaytirdi, uning natijalari, G‘arb fikricha, soxtalashtirilgan. Vashington sakkiz nafar jismoniy va besh yuridik shaxsga nisbatan Aleksandr Lukashenko siyosati va Ukraina urushiga yordam bergani uchun sanksiyalar joriy qilmoqda, dedi 9 avgust, chorshanba kuni AQSh davlat kotibi Entoni Blinken.

Qo‘shma Shtatlar, shuningdek, «Belarus demokratik institutlariga putur yetkazgan yoki zarar yetkazgan» 101 rejim amaldori va ularga aloqador shaxslarga nisbatan viza cheklovlarini qabul qilmoqda. Ushbu choralar, xususan, belaruslarga nisbatan siyosiy sabablarga ko‘ra hukm chiqargan bir necha sudyalarga nisbatan qo‘llaniladi, deya qo‘shimcha qildi AQSh Davlat departamenti.

Bundan tashqari, AQSh Moliya vazirligi Belarus Davlat nazorati qo‘mitasining Moliyaviy tekshiruvlar departamenti va uning direktorlar kengashining to‘rt nafar a’zosini sanksiyalar ro‘yxatiga kiritdi. Ro‘yxatga AQSh sanksiyalari ostida qolgan belaruslik tadbirkor Aleksey Aleksinning uch nafar oila a’zosi ham kiritilgan. Cheklov choralari Belarus hokimiyatiga tegishli bo‘lgan yoki nazorat qilinuvchi uchta tashkilotga nisbatan ham joriy etildi: «Belavia», Minsk fuqaro aviatsiyasi 407-zavodi va Belarus metallurgiya kompaniyasi holdingining boshqaruvchi kompaniyasi - «Belarus metallurgiya zavodi» OAJ.

Kanada Belarusga nisbatan sanksiyalar ro‘yxatini kengaytirdi

Kanada shuningdek, Belarusga nisbatan sanksiyalar ro‘yxatini kengaytirdi, deya ma’lum qildi Kanada Tashqi ishlar vazirligi. «Tashqi ishlar vaziri Melani Joli bugun (9 avgust) maxsus iqtisodiy choralar to‘g‘risidagi qonunga muvofiq, to‘qqiz nafar jismoniy va yetti yuridik shaxsga nisbatan sanksiya qo‘llashini ma’lum qildi», — deyiladi vazirlik bayonotida. 2020 yil 9 avgustda Belarusdagi prezidentlik saylovlarida Aleksandr Lukashenko o‘zini g‘olib deb e’lon qildi, saylov komissiyasi ma’lumotlariga ko‘ra, u 80 foizdan ko‘proq ovoz olgan. Bu mamlakatda ommaviy noroziliklarga sabab bo‘ldi. Namoyishchilarga ko‘ra, saylovda Svetlana Tixanovskaya g‘alaba qozongan. Saylovlardan ko‘p o‘tmay, u Litvaga ketishga majbur bo‘ldi. O‘shandan beri Belarus fuqarolik jamiyatining ko‘plab vakillari Boltiqbo‘yi mamlakatlari va Polshada boshpana topdi.