АҚШ ва Канада Беларусга қарши санкцияларни кенгайтирди

Вашингтон «Беларуснинг демократик институтларига путур етказганлик ёки уларга зарар етказганлик учун» санкциялар ва виза чекловларини жорий қилди. Канада ҳам Беларус учун санкциялар рўйхатини кенгайтирди.

Фото: AP

АҚШ ва Канада Беларусга қарши санкцияларни мамлакатдаги президентлик сайловларининг уч йиллиги муносабати билан узайтирди, унинг натижалари, Ғарб фикрича, сохталаштирилган. Вашингтон саккиз нафар жисмоний ва беш юридик шахсга нисбатан Александр Лукашенко сиёсати ва Украина урушига ёрдам бергани учун санкциялар жорий қилмоқда, деди 9 август, чоршанба куни АҚШ давлат котиби Энтони Блинкен.

Қўшма Штатлар, шунингдек, «Беларус демократик институтларига путур етказган ёки зарар етказган» 101 режим амалдори ва уларга алоқадор шахсларга нисбатан виза чекловларини қабул қилмоқда. Ушбу чоралар, хусусан, беларусларга нисбатан сиёсий сабабларга кўра ҳукм чиқарган бир неча судьяларга нисбатан қўлланилади, дея қўшимча қилди АҚШ Давлат департаменти.

Бундан ташқари, АҚШ Молия вазирлиги Беларус Давлат назорати қўмитасининг Молиявий текширувлар департаменти ва унинг директорлар кенгашининг тўрт нафар аъзосини санкциялар рўйхатига киритди. Рўйхатга АҚШ санкциялари остида қолган беларуслик тадбиркор Алексей Алексиннинг уч нафар оила аъзоси ҳам киритилган. Чеклов чоралари Беларус ҳокимиятига тегишли бўлган ёки назорат қилинувчи учта ташкилотга нисбатан ҳам жорий этилди: «Белавиа», Минск фуқаро авиацияси 407-заводи ва Беларус металлургия компанияси ҳолдингининг бошқарувчи компанияси - «Беларус металлургия заводи» ОАЖ.

Канада Беларусга нисбатан санкциялар рўйхатини кенгайтирди

Канада шунингдек, Беларусга нисбатан санкциялар рўйхатини кенгайтирди, дея маълум қилди Канада Ташқи ишлар вазирлиги. «Ташқи ишлар вазири Мелани Жоли бугун (9 август) махсус иқтисодий чоралар тўғрисидаги қонунга мувофиқ, тўққиз нафар жисмоний ва етти юридик шахсга нисбатан санкция қўллашини маълум қилди», — дейилади вазирлик баёнотида. 2020 йил 9 августда Беларусдаги президентлик сайловларида Александр Лукашенко ўзини ғолиб деб эълон қилди, сайлов комиссияси маълумотларига кўра, у 80 фоиздан кўпроқ овоз олган. Бу мамлакатда оммавий норозиликларга сабаб бўлди. Намойишчиларга кўра, сайловда Светлана Тихановская ғалаба қозонган. Сайловлардан кўп ўтмай, у Литвага кетишга мажбур бўлди. Ўшандан бери Беларус фуқаролик жамиятининг кўплаб вакиллари Болтиқбўйи мамлакатлари ва Полшада бошпана топди.