Finlandiyada radiologik va yadroviy tahdidlarga qarshi eng yirik ombor yaratiladi

Finlandiya kimyoviy, biologik, radiologik va yadroviy tahdidlar yuzaga kelgan taqdirda zarur uskunalar va dori vositalari uchun mo‘ljallangan strategik omborni quradi. U Yevropa Ittifoqidagi eng katta inshoot bo‘ladi. Bu haqda Finlandiya ichki ishlar vazirligi xabar berdi. 

Omborda favqulodda vaziyatlarda, ayniqsa Shimoliy va Sharqiy Yevropa mamlakatlarida favqulodda vaziyatlar yuzaga kelganda xodimlar va tinch aholi tomonidan foydalanish uchun himoya vositalari, monitoring uskunalari, detektorlar, tezkor testlar, shuningdek dori-darmonlar va vaksinalar saqlanadi. 

Fransiya, Polsha va Xorvatiyada shunga o‘xshash omborxonalar qurilmoqda, biroq Finlandiyadagi obekt eng yirik bo‘ladi. 

Ba’zi zaxiralar 2024 yildan boshlab omborga qo‘yiladi. 

Finlandiya omborni barpo qilish uchun Yevropa Ittifoqidan 242 mln yevro yordam olgan.