Tadbirkorlik sub’yektlarining to‘g‘ridan to‘g‘ri sudga shikoyat qilishidagi cheklovlar olib tashlanmoqda

“O‘zbekiston Respublikasining ayrim qonun hujjatlariga o‘zgartirishlar kiritish to‘g‘risida”gi qonun bilan Soliq kodeksi hamda “Aksiyadorlik jamiyatlari va aksiyadorlarning huquqlarini himoya qilish to‘g‘risida”gi, “Mas’uliyati cheklangan hamda qo‘shimcha mas’uliyatli jamiyatlar to‘g‘risida”gi va “Xo‘jalik shirkatlari to‘g‘risida”gi qonunlarga o‘zgartirishlar kiritilmoqda. Bu haqda Kun.uz’ga Adliya vazirligining Jamoatchilik bilan aloqalar bo‘limi ma’lum qildi.

Ta’kidlanishicha, mazkur o‘zgarishlar tadbirkorlik sub’yektlari o‘z huquqlarini sud orqali himoya qilish imkoniyatini cheklovchi normalarni bekor qilish hamda tadbirkorlik faoliyatini tartibga solishdagi ayrim majburiy talablarni qisqartirishga qaratilgan. 

Xususan, Soliq kodeksida soliq to‘lovchilar sayyor soliq tekshiruvlari va soliq auditi natijalari bo‘yicha qabul qilingan qarorlar ustidan to‘g‘ridan to‘g‘ri sudga shikoyat qilishi mumkinligi belgilanmoqda. Amaldagi tartibga ko‘ra, sayyor soliq tekshiruvlari va soliq auditi natijalari bo‘yicha qabul qilingan qaror ustidan yuqori turuvchi soliq organiga shikoyat qilingandan (shikoyat ko‘rib chiqilganidan) keyin sudga murojaat qilish mumkin.

Endilikda tadbirkorlik sub’yektlari o‘z huquqlarini to‘g‘ridan to‘g‘ri sud orqali himoya qilishi yoki ma’qul deb hisoblasa, yuqori turuvchi soliq organiga shikoyat qilishi mumkin bo‘ladi.

Shuningdek, tadbirkorlik sub’yektlarining ustav fondini kamaytirish to‘g‘risida qaror qabul qilinganda kreditorlarni yozma ravishda xabardor etish va ommaviy axborot vositalarida bu haqida e’lon berish majburiyatlarini bekor qilish nazarda tutilyapti.