Kriviy Rihga raketa zarbasi va front yaqinida kungaboqar o‘rimi. Urush suratlari

Ukrainada urushning 562-kuni o‘tdi. Asosiy suratlar

Kriviy Rihda rossiyaliklar raketasi politsiya binosiga kelib tushdi. 74 kishi yaralangan, jumladan to‘qqiz politsiyachi. Bir kishi halok bo‘lgan.
Jurnalistlar aniqlashicha, Rossiya Ukraina bilan urushga kubaliklarni yoppasiga yollagan. Kuba hukumati tekshiruv ishlari olib bormoqda. Ish doirasida 17 kishi hibsga olingan. Rossiya tomoni izoh bermayapti.
Volodimir Zelenskiy «Vagner» XHK asoschisi Yevgeniy Prigojinni Vladimir Putin «o‘ldirgani» haqida aytdi. Ukraina prezidenti qanday asosga ko‘ra bunday xulosaga kelganiga aniqlik kiritmagan.
Xerson oblastida rossiyaliklar aviabombasi portlashi oqibatida tinch aholi vakillaridan uch kishi halok bo‘ldi. Sumi shahri o‘qqa tutilishi oqibatida to‘rt kishi yaralangan. Zaporijjyada — bir yarador.
RF qo‘shini hafta davomida beshinchi bor Odessa oblastiga dronlar bilan hujum qildi. Vayrongarchiliklar va jabrlanganlar haqida ma’lumot yo‘q.

Kun kadri. Zaporijjya oblastidagi uy hovlisida tank gusenitsasi

Kriviy Rihga zarba

Volodimir Zelenskiy tug‘ilgan shahar — Dnipropetrovsk oblastining Kriviy Rih shahrida — rossiyaliklar raketasi politsiya binosiga kelib tushdi. So‘nggi ma’lumotlarga ko‘ra, 74 kishi yaralangan, bir politsiyachi halok bo‘lgan. Jabrlanganlarning to‘qqiz nafari — politsiyachilar, ulardan uch nafari xarobalar ostidan chiqarib olingan.