Senat raisi Janubiy Koreya bosh vaziri bilan hamkorlik istiqbollarini muhokama qildi 

Tanzila Norboyeva Janubiy Koreya bosh vaziri Xan Dok Su bilan uchrashdi. Muloqotda O‘zbekiston va Janubiy Koreya hamkorligining keng doirasi, jumladan, savdo-iqtisodiy, investitsiyaviy va ijtimoiy sohalardagi munosabatlarning hozirgi holati va istiqbollari muhokama qilindi. 

Koreya xalqaro hamkorlik agentligi, Koreya Eksimbanki va uning fondlari bilan samarali hamkorlik natijasida ular bilan amalga oshirilayotgan loyihalarning umumiy portfeli 3 milliard dollardan ziyodni tashkil etgani alohida qayd etildi. 

Suhbat chog‘ida Iqtisodiy rivojlanish bo‘yicha hamkorlik jamg‘armasi (EDCF) bilan birgalikda tibbiyot va farmatsevtika klasterini tashkil etish, elektronika mahsulotlari va yarim o‘tkazgichlar ishlab chiqarish bo‘yicha O‘zbekiston-Koreya klasterini yaratish va boshqa loyihalarni amalga oshirishni jadallashtirish zarurligi qayd etildi. 

Janubiy Koreya bosh vaziri kun tartibining barcha dolzarb yo‘nalishlari bo‘yicha ikki tomonlama hamkorlikni chuqurlashtirish bo‘yicha yangi konstruktiv takliflarni faol ishlab chiqish tarafdori ekanini ta’kidladi. 

Uchrashuv yakunlari bo‘yicha qamrovi jihatidan kengayib borayotgan ikki tomonlama muloqotni amaliy mazmun bilan yanada boyitishga kelishib olindi.