Sifatsiz neft mahsulotlari eng ko‘p aniqlangan holatlar, asosan, Buxoro, Jizzax, Qashqadaryo va Samarqand viloyatlari hissasiga to‘g‘ri kelishi aytilmoqda.
2023 yilning o‘tgan 9 oyida ayrim xususiy «zapravka»larda 9 mln 150 ming litr neft mahsulotlari sifatsiz ekani aniqlanib, ularning iste’molga chiqarilishining oldi olindi. Bu haqda Energetika vazirligi xabar berdi.
Qayd qilinishicha, Energetika vazirligi huzuridagi «O‘zenergoinspeksiya» tomonidan neft mahsulotlari sifatini nazorat qilish bo‘yicha joylarda muntazam ravishda nazorat tadbirlari o‘tkazilmoqda.
Xususan, joriy yilning yanvar–sentabr oylarida xususiy avtomobillarga yoqilg‘i quyish shoxobchalarida o‘tkazilgan nazorat tadbirlari davomida 225 ta holatda sifatsiz neft mahsulotlari sotilayotgani aniqlangan. 179 mln 39 ming litr neft mahsulotlarining 9 mln 150 ming litri sifatsizligi bois iste’molga chiqarilmagan.
Sifatsiz neft mahsulotlari eng ko‘p aniqlangan holatlar, asosan, Buxoro, Jizzax, Qashqadaryo va Samarqand viloyatlari hissasiga to‘g‘ri kelishi aytilmoqda.
