“O‘zbekinvest” kompaniyasida “O‘zbek tili bayrami kuni”ga bag‘ishlab tadbir tashkil etildi

20 oktabr kuni “O‘zbekinvest” sug‘urta kompaniyasi bosh ofisida “O‘zbek tili bayrami kuni”ga bag‘ishlangan tantanali tadbir bo‘lib o‘tdi. Tadbirda so‘zga chiqqan Bosh direktor R.Azimov hamda A.Navoiy nomidagi Toshkent davlat o‘zbek tili va adabiyoti universitetining taklif etilgan mutaxassis-xodimi tomonidan mamlakatimizda ona tilining o‘rni va ahamiyatini oshirishga katta e’tibor qaratilayotgani, shuningdek, ona tilining rivojlanishi jamiyat taraqqiyotining omili, millatning bosh belgisi, davlat suverenitetining asosiy ramzi ekanligi aytib o‘tildi. Shuningdek, ona tilining barhayot bo‘lishi, uning to‘laqonli yashashi, millatning ma’naviyati, ma’rifati va madaniyati uchun zarurligi qo‘shimcha qilinib, ko‘p millatli mamlakatimizdagi xalqlarning ona tillarini asrab-avaylash muammosiga ham to‘xtalib o‘tildi.

O‘zbek tili – turkiy tillarning katta oilasiga kiruvchi dunyodagi eng yirik tillardan biri. Ayni paytda mazkur tilda deyarli 50 mln kishi so‘zlashadi va qariyb 60 mamlakatda ta’lim beriladi. Shuningdek, bugungi kunda dunyoda 5600 dan ortiq tillar mavjud bo‘lsa, ulardan atigi 200 tasi, jumladan, o‘zbek tili ham rasmiy til sifatida tan olingani aytib o‘tildi.

So‘ngra bayram munosabati bilan kompaniya xodimlari o‘rtasida ijodiy tanlovlar o‘tkazildi. Mushoira tanlovida ishtirokchilar g‘azallar va she’rlarni ifodali o‘qish bo‘yicha o‘z iste’dodlarini namoyon etish imkoniyatiga ega bo‘ldilar. “O‘zbekinvest” kompaniyasi xodimlari tomonidan E.Vohidovning “Ona tilim o‘lmaydi”, Muhammad Yusufning “Ona tilim” she’rlari, A.Navoiyning “Ko‘rgali husningni”, “Kecha kelgumdur debon” va boshqa g‘azallari o‘qib berildi.

Ijodiy tanlov natijalariga ko‘ra, g‘oliblarga pul mukofotlari topshirildi. Shuningdek, “O‘zbekinvest” kompaniyasining har bir xodimiga A.Navoiy, H.Olimjon, Zulfiya, A.Qodiriy, Oybek, O‘.Hoshimov, G‘.G‘ulom, A.Fitrat, Cho‘lpon, E.Vohidov, A.Oripov, Muhammad Yusuf, X.Xudoyberdiyeva, A.Avloniy, P.Qodirov va boshqa o‘zbek adabiyoti namoyondalarining asarlari sovg‘a qilindi.

Koll-markaz: (+998) 71−207−60−00, 1160

Sayt|Facebook|Instagram|Telegram|YouTube