AQSh sanksiya ostidagi Rossiya neftining eksporti bo‘yicha katta tergovni boshladi - OAV

AQSh Moliya vazirligi G‘arb sanksiyalarini chetlab o‘tib, Rossiya neftini tashishda gumon qilinayotgan 100 ga yaqin tankerlar haqida ma’lumot olish uchun kema boshqaruv kompaniyalariga bildirishnoma yubordi. Bu haqda hujjatlar bilan tanishgan manbaga tayanib, Reuters xabar berdi.

Xorijiy aktivlarni nazorat qilish boshqarmasi (OFAC; AQSh Moliya vazirligi bo‘limi) 30 ta davlatdagi kompaniyalarga bildirishnoma yuborgan. Bu ish Rossiyadan neft eksportiga narx chegarasi joriy qilinganidan beri eng jiddiy tergov ekani aytilmoqda. Shu bilan birga, AQSh Moliya vazirligi tergov boshlangani haqidagi ma’lumotni tasdiqlashdan bosh tortgan.

2022 yil dekabr oyida G7 davlatlari, Yevropa Ittifoqi va Avstraliya Rossiya neftining dengiz eksportiga cheklovlar joriy etdi - bir barrel uchun 60 dollargacha. Biroq, agentlik ta’kidlaganidek, 2023 yilda neft narxi oshishi tufayli, Rossiya energiya resurslari sanksiyalar buzilgan holda limitdan yuqori narxda sotilgan.

Hujjatlarni o‘rgangan manbaning aytishicha, hozirda tergov qilinayotgan G‘arb kemalarining bir qismi Kozmino portidan Rossiya neftini tashishda ishtirok etgan, qolganlari esa Finlyandiya ko‘rfazidagi Primorsk portida mahsulot yuklagan. Dastlabki ma’lumotlarga ko‘ra, bunday kompaniyalar orasida Turkiyada joylashgan Beks Shipping ham bor.