BMT: Ukrainani tiklash uchun 400 mlrd dollardan ortiq mablag‘ kerak bo‘ladi

BMT bosh kotibi yordamchisi Miroslav Enchaning so‘zlariga ko‘ra, urushdan keyin Ukrainani qayta tiklash shartli ravishda 400 milliard dollardan ortiqqa tushadi. Bu haqda u 21 noyabr kuni BMT Xavfsizlik kengashi yig‘ilishida ma’lum qildi. 

Bundan tashqari, Encha fuqarolik infratuzilmasiga qarshi davom etayotgan hujumlar va tinch aholiga hujumlar sovuq havoning boshlanishi bilan kuchayishi mumkinligidan xavotir bildirdi. Uning so‘zlariga ko‘ra, Rossiya 11 noyabr kuni Kiyevni yana o‘qqa tuta boshlagan va Ukrainaning boshqa shaharlariga hujumlarni davom ettirgan. «Bu urushning yakuniy qurbonlari ancha katta bo‘lishi mumkin, chunki zo‘ravonlik to‘xtatilishidan darak yo‘q», dedi BMT bosh kotibi yordamchisi. 

BMTning Ukrainaga qishda yordam berish rejasi

Enchaning ta’kidlashicha, Ukraina hozirda BMT va uning sheriklari tomonidan mahalliy hokimiyatlar bilan birgalikda ishlab chiqilgan qishki javob rejasini faol ravishda amalga oshirmoqda. Unga ko‘ra, 1,7 million aholining uylarini ta’mirlash uchun materiallar yetkazib berish, qishki kiyim-kechak, isitish moslamalari, yonilg‘i xarid qilish hamda markazlashtirilgan suv ta’minoti va isitish tizimlarini ta’mirlash uchun yana 435 million dollar kerak bo‘ladi. Ayni paytda, Enchaning so‘zlariga ko‘ra, taxminan 360 ming ukrainalik yordam olgan. 

Gumanitar yordam uchun pul yetarli emas 

Bosh kotib yordamchisi, shuningdek, Ukrainaga 2023 yilga mo‘ljallangan gumanitar yordam ko‘rsatish rejasining atigi 54 foizi moliyalashtirilganini aytdi. Joriy yilda mamlakatda 10 milliondan ortiq kishi BMT tomonidan gumanitar yordam oldi. Encha yil oxirigacha ularning sonini 11 millionga yetkazish niyatini bildirdi. Yana 4 millionga yaqin yordamga muhtoj ukrainalik Rossiya tomonidan egallab olingan hududlarda va ular bilan bog‘lanishning imkoni yo‘q.

«Global muammolar va inqirozlar fonida xalqaro hamjamiyat Ukrainaga e’tiborini qaratishi va bu azob-uqubatlarga chek qo‘yishi kerak», deb ta’kidladi Encha.