Litva Ukrainaga qishki harbiy yordam paketini topshirdi

Litva hukumati Rossiyaga qarshi turish uchun Ukrainaga yangi harbiy yordam paketini topshirdi. Vilnyusdagi Mudofaa vazirligi 22 noyabr, chorshanba kuni ma’lum qilishicha, u 7,62x51 mm kalibrli 3 million o‘q, masofadan turib portlatish tizimlari va qishki jihozlarni o‘z ichiga olgan.

Anushauskas: Vilnyus Ukrainaning asosiy ehtiyojlariga reaksiya bildirdi

Litva mudofaa vaziri Arvidas Anushauskas: «Ukrainaga yordam berish majburiyatimizga sobit bo‘lib qolamiz», dedi. Uning so‘zlariga ko‘ra, Vilnyus yangi yordam paketini shakllantirib, «Ukrainaning eng muhim ehtiyojlari va ustuvorliklariga» reaksiya bildiryapti. «Qishki og‘ir sharoitlarda o‘q-dorilar, masofadan portlatish tizimlari va jihozlar bilan ta’minlash orqali biz Ukrainaning Rossiyaga qarshiligini sezilarli darajada kuchaytirmoqdamiz», — deya qo‘shimcha qildi Anushauskas. 

Litva Mudofaa vazirligi 17 noyabr kuni Ukrainaga yangi harbiy yordam paketini e’lon qildi. Oy boshida Vilnyus Kiyevga NASAMS o‘rta masofaga mo‘ljallangan zenit-raketa tizimlari uchun ikkita uchirish qurilmasini yetkazib berdi. 

Litva Ukrainaning eng qat’iy tarafdorlari va donorlaridan biridir. Boltiqbo‘yi mamlakati Mudofaa vazirligi ma’lumotlariga ko‘ra, Rossiyaning keng ko‘lamli harbiy harakatlari boshlanganidan beri Vilnyus Ukrainaga yarim milliard yevrolik harbiy yordam o‘tkazgan.