YeI Moldova va Gurjiston ittifoqqa qisman a’zo bo‘lishi mumkinligini istisno etmadi

Yevropa Ittifoqi Moldova va Gurjistonni qisman, ya’ni birinchi navbatda Dnestrbo‘yi, Abxaziya va Janubiy Osetiya hududlarisiz a’zolikka qabul qilish variantini ko‘rib chiqishi mumkin. Bu haqda Yevropa Ittifoqi tashqi siyosat xizmati rasmiy vakili Peter Stano 24 noyabr, juma kuni parchalari chop etilgan «Izvestiya» gazetasiga bergan intervyusida ma’lum qildi. 

«Gurjiston va Moldovaning Yevropa kelajagi mojarolar garovida bo‘lishi mumkin emas. Bu YeIning eng yuqori darajasida ham tasdiqlandi. Biz Gurjiston va Moldovaning hududiy yaxlitligi va suverenitetini qat’iy qo‘llab-quvvatlashda davom etamiz», - deya o‘z suhbatdoshidan iqtibos keltiradi nashr. 

Ukraina, Moldova va Gurjistonning YeIga yo‘li 

Yevropa komissiyasining 8 noyabr kuni e’lon qilingan 2023 yil uchun kengayish bo‘yicha hisobotida Ukraina va Moldova bilan a’zolik bo‘yicha muzokaralarni boshlash, shuningdek, Gurjistonga Yevropa Ittifoqiga nomzod davlat maqomini berish tavsiya etiladi. 

Avvalroq, oktyabr oyi oxirida Moldova prezidenti Mayya Sandu o‘z mamlakati Dnestrbo‘yi hududisiz Yevropa Ittifoqiga kirishi mumkinligini aytgan edi. «Ideal variant - reintegratsiyalangan mamlakatning YeIga qo‘shilishi, ya’ni o‘ng va chap qirg‘oqlarning. Agar bu amalga oshmasa, u yoki bu sabablarga ko‘ra imkonsiz bo‘lsa, birinchi navbatda YeIga integratsiya qilishning boshqa varianti mavjud - o‘ng qirg‘oq, keyin chap», dedi siyosatchi Vocae Basarabiei telekanali efirida. Ushbu rejaning amalga oshirilishi geosiyosiy vaziyatga bog‘liq, dedi u.