Qoʻshimcha funksionallar
-
Tungi ko‘rinish
Orbansiz sammit: YeI Ukraina bo‘yicha yagona pozitsiyaga keldi
Bryusselda bo‘lib o‘tgan Yevropa Ittifoqi sammitida Ukraina masalasi asosiy mavzulardan biriga aylandi. Vengriyaning sobiq bosh vaziri Viktor Orban hokimiyatdan ketganidan keyin ilk bor YeIning barcha 27 a’zosi Ukraina bo‘yicha qo‘shma bayonotni qo‘llab-quvvatladi va Rossiyaga qarshi sektor sanksiyalarini yana bir yilga uzaytirishga kelishib oldi.
18 iyun kuni boshlangan sammitda dastlab Yevroittifoqning yetti yillik budjeti va Xitoy bilan iqtisodiy munosabatlar muhokama qilinishi rejalashtirilgan edi. Biroq Yevropa yetakchilari kun tartibini Ukraina mavzusidan boshladi.
Sammitda ishtirok etgan Ukraina prezidenti Volodimir Zelenskiy Yevropa kengashi raisi Antoniu Koshta va Yevropa komissiyasi rahbari Ursula fon der Lyayyen hamrohligida yig‘ilishda qatnashdi. Uning ta’kidlashicha, asosiy maqsad Ukrainaning Yevropa Ittifoqiga a’zolik jarayonini tezlashtirishdan iborat.
Zelenskiy Yevropa Ittifoqi Ukraina bilan a’zolik muzokaralarining birinchi klasteri bo‘yicha rasmiy muzokaralarni boshlaganini olqishladi va qolgan beshta yo‘nalish bo‘yicha ham tez orada ishlar boshlanishiga umid bildirdi.
Yevropa kengashi raisi Antoniu Koshta bu haftani Ukraina uchun tarixiy deb atadi. Ursula fon der Lyayyen esa Kiyev so‘nggi yillarda zarur islohotlarni amalga oshirgani uchun muzokaralarning birinchi bosqichini ochishga munosib ekanini ta’kidladi.
Biroq Bryusselda keyingi klasterlarni qachon ochish masalasi hali to‘liq hal etilmagan. Ayrim davlatlar, jumladan Fransiya va Niderlandiya, texnik va tashkiliy sabablarga ko‘ra bu jarayonni tezlashtirishga ehtiyotkorlik bilan yondashmoqda.
Sammitda Ukrainaga harbiy yordam va Rossiyaga nisbatan bosimni kuchaytirish masalasi ham muhokama qilindi. Yevropa yetakchilari Moskvaga qarshi iqtisodiy choralarni yanada kuchaytirish va 21-sanksiyalar paketini tezroq qabul qilish zarurligini ta’kidladi.
Yig‘ilishning eng muhim qarorlaridan biri Rossiyaga qarshi sektor sanksiyalarini yana bir yil muddatga uzaytirish bo‘ldi. Ilgari bunday cheklovlar har olti oyda qayta ko‘rib chiqilar edi. Bu qarorning qabul qilinishiga Vengriyada hukumat almashgani ham ta’sir ko‘rsatgani qayd etilmoqda.
Shuningdek, Yevropa yetakchilari Ukrainadagi urushni diplomatik yo‘l bilan yakunlash imkoniyatlarini ham muhokama qildi. Ayrim ishtirokchilar Yevropa kengashi raisi Antoniu Koshta kelajakda Moskva bilan muloqot olib borishi mumkinligini bildirgan.
Volodimir Zelenskiy uchrashuv davomida Ukraina Yevropa qadriyatlari va mustaqilligi uchun katta qurbonliklar berganini ta’kidlab, mamlakatning YeIga a’zolikka munosib ekanini yana bir bor eslatdi.
Biroq kuzatuvchilar fikricha, Orbanning qarshiligi bartaraf etilgan bo‘lsa-da, Ukrainaning Yevropa Ittifoqiga qo‘shilishi bo‘yicha barcha savollar hali ham ochiqligicha qolmoqda.
