Ekvador parlamenti sobiq prezidentni korrupsiyada aybdor deb topdi

Ekvador parlamenti 30 noyabr kuni sobiq prezident Gilyyermo Lassoni davlat mablag‘larini o‘g‘irlashda aybdor deb topdi va ma’lumotlarni prokurorlarga topshirdi.

«Milliy assambleya 116 ovoz bilan Gilyyermo Lassoni o‘g‘irlik uchun siyosiy javobgarlikka tortishga qaror qildi va tegishli tergovni boshlash uchun siyosiy jarayonning barcha hujjatlarini prokuratura va nazorat organiga yubordi», deyiladi parlamentning ijtimoiy tarmoqdagi sahifasida.

Qonun chiqaruvchilar Lassoni davlatga qarashli FLOPEC neft-tanker kompaniyasidagi korrupsiya sxemasiga aloqador deb hisoblashdi. Shu bilan birga, parlament a’zolari sobiq davlat rahbariga davlat lavozimini egallashni taqiqlay olmasligini tan oldilar, chunki bu konstitutsiyada nazarda tutilmagan.

17 may kuni vakolat muddati 2025 yilda tugashi kerak bo‘lgan Lasso Milliy assambleyani tarqatib yuborish va yangi prezidentlik va parlament saylovlarini o‘tkazish to‘g‘risidagi farmonni imzoladi.

17 noyabr kuni yangi qonun chiqaruvchi organ ish boshladi, u sobiq prezidentning aybdorligi masalasini ko‘rib chiqishni davom ettirishga qaror qildi.

23 noyabr kuni 15 oktyabrdagi ikkinchi tur yakunlariga ko‘ra saylangan Daniel Noboa prezident lavozimini egalladi. Ekvadorda navbatdagi parlament va prezident saylovi 2025 yilda bo‘lib o‘tishi kerak.