O‘zbekiston Jahon savdo tashkilotiga a’zo bo‘lish jarayoni doirasida Ekvador bilan ikki tomonlama muzokaralarni yakunladi. Bu haqda Prezidentning JST masalalari bo‘yicha maxsus vakili Azizbek Urunov ma’lum qildi.
Urunovning qayd etishicha, muzokaralarni yakunlash to‘g‘risidagi bayonnoma 6 noyabr kuni imzolangan.
«Ekvador tomoniga konstruktiv muloqot va qo‘llab-quvvatlash uchun samimiy minnatdorlik bildiraman. Biz bu jarayonga to‘liq ishonamiz va birgalikdagi sa’y-harakatlarimiz bilan faxrlanamiz. Ishlar davom etmoqda — oldinda JSTning yana ikkita a’zosi turibdi», — deb yozdi u LinkedIn’da.
Avvalroq, O‘zbekiston Jahon savdo tashkilotiga a’zo bo‘lish jarayoni doirasida Kanada va Panama bilan ham ikki tomonlama muzokaralarni muvaffaqiyatli yakunlagani xabar qilingandi.
