Xitoy rahbari Si Jinping Yevroittifoq rahbariyatini qabul qildi

XXR raisi Si Jinping Pekinda Yevrokomissiya raisi Ursula fon der Lyayyen va Yevropa kengashi raisi Sharl Mishelni qabul qildi hamda ular bilan muzokaralar o‘tkazdi, deb xabar bermoqda 7 dekabr, payshanba kuni «Sinxua» axborot agentligi. Bu o‘tgan yilgi videosammitdan keyin 2019 yildan beri Pekinda Yevropa Ittifoqi rahbariyati va Si o‘rtasidagi birinchi yuzma-yuz uchrashuvdir.

Tushlikdan so‘ng fon der Lyayyen va Mishel Xitoy bosh vaziri Li Tsyan bilan uchrashadi, so‘ngra rasmiy kechki ovqat va matbuot anjumani o‘tkaziladi. Yevropa yetakchilariga Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel hamrohlik qilmoqda. 

Tashrif dasturi keng ko‘lamli

Yevropa Ittifoqi-Xitoy sammiti kun tartibiga keng ko‘lamli masalalar kiradi – savdo kelishmovchiligidan tortib, Ukraina va Yaqin Sharq atrofidagi mojarolargacha. Uchrashuv oldidan fon der Lyayyen Xitoyni savdoda murosaga kelishga chaqirdi. «Yevropa davlat va hukumat rahbarlari savdo nomutanosibligiga cheksiz toqat qilmaydi. Bizda bozorimizni himoya qilish uchun vositalar bor», dedi u 5 dekabr kuni. 

Shundan so‘ng Pekin Yevropa Ittifoqining savdodagi muvozanatni tiklash uchun Xitoyga nozik texnologiyalarni eksport qilishni qiyinlashtirishga urinishlari «mantiqqa to‘g‘ri kelmasligini» bildirdi. 

Sammitning yana bir mavzusi Pekinni bir qator yevropalik siyosatchilarga nisbatan sanksiyalarni bekor qilishga ko‘ndirishga qaratilgan urinish bo‘ladi. Xitoy 2021 yilda, xususan, Yevroparlament deputati va Germaniya «yashillar» partiyasining sobiq hamraisi Raynxard Byutikoferga nisbatan vizani taqiqlash va boshqa sanksiyalar joriy qildi. Yevropa Ittifoqining Xitoyga qarshi sanksiyalariga Pekin shunday javob qaytardi.