Navalniy endi jazoni o‘tash koloniyasi ro‘yxatida yo‘q, u bilan aloqa uzilgani aytildi 

«Melexovodagi IK-6 koloniyasi xodimlari advokatga Navalniy endi ularning ro‘yxatida yo‘qligini aytishdi. Uni qayerga o‘tkazishganini aytishdan bosh tortishmoqda», dedi Yarmish. 

Avvalroq, Yarmish 6 kundan beri u bilan bog‘lana olmayotgani haqida xabar bergan edi. 

«Aleksey Navalniy videoaloqa orqali sudda yana ishtirok etmadi. Koloniya xodimlari «7 dekabrdan beri elektr ta’minotini tuzata olmayapmiz», deyishdi. Ular shunchaki masxara qilishyapti. 6 kundan beri Alekseyning qayerdaligini va unga nima bo‘layotganini bilmaymiz». 

Oldinroq, Yarmish Navalniy o‘tgan hafta o‘zini yomon his qilgani, boshi aylanib qolgani va unga tomchi ukol qilinganini aytgan edi. Shundan so‘ng siyosatchi bilan aloqa yo‘qoldi, u sud majlislarida ishtirok etmadi. Advokatlar ham uning qayerdaligini bilishmaydi.