MChJ aslida mebel ishlab chiqarish uchun tashkil etilgan bo‘lsa-da, mayning qurilmalarini o‘rnatib, noqonuniy tarzda elektr energiyasini ishlatgan.
Energetika vazirligi huzuridagi “O‘zenergoinspeksiya” tomonidan huquqni muhofaza qiluvchi organlar va “Hududiy elektr tarmoqlari” AJ mutaxassislari ishtirokida Samarqand viloyatida navbatdagi reyd tadbiri o‘tkazilgan. Bu haqda vazirlik matbuot xizmati xabar bermoqda.
Tadbir davomida Samarqand shahrida faoliyat yuritib kelayotgan, mebel ishlab chiqarish sexi shaklida ro‘yxatdan o‘tgan “G.B.M.” MChJ 47 dona qurilmaga ega mayning fermasi faoliyatini tashkil etgani aniqlangan.
Dastlabki hisob-kitoblarga ko‘ra, ushbu MChJ tomonidan davlat manfaatlariga 9 mlrd 852 mln so‘m zarar yetkazilgan va uni undirish choralari ko‘rilmoqda.
Qayd etilishicha, qoidabuzar iste’molchiga nisbatan belgilangan tartibda chora ko‘rish uchun tegishli hujjatlar huquqni muhofaza etuvchi organlarga taqdim qilingan.
Avvalroq, O‘zbekistonda yilning boshidan buyon 26 ta noqonuniy mayning fermasi aniqlangani va ular davlatga 58 milliard so‘m zarar yetkazgani ma’lum qilingandi.
