Toshkent viloyatida o‘gay ona 13 yoshli qizga zo‘ravonlik qilgani aniqlandi 

Toshkent viloyati, Zangiota tumanida 13 yoshli qizga nisbatan o‘gay onasi tomonidan muntazam ravishda jismoniy va ruhiy zo‘ravonlik qilingani holati tekshirilmoqda. Bu haqda bolalar ombudsmani Surayyo Rahmonova xabar berdi. 

Qayd etilishicha, holat ichki ishlar organlari tomonidan o‘rganilganda, 2010 yilda tug‘ilgan qizga o‘gay onasi tomonidan zo‘ravonlik qilingani aniqlangan. Qizning otasi ham turmush o‘rtog‘iga qonuniy chora ko‘rishni so‘ragan. Holat yuzasidan tergovga qadar tekshiruv ishlari olib borilmoqda.

Ombudsman xabariga ko‘ra, qiz sud-tibbiyot ekspertizasidan o‘tkazilgan, ammo tanasida jarohatlar aniqlanmagan. U bilan psixolog yakka tartibda suhbat o‘tkazgan. Bolaga ruhiy zo‘ravonlik yetkazilgani va uning darajasini aniqlash uchun ekspertiza tayinlangan. Shuningdek, o‘gay onaning ruhiy holatiga huquqiy baho berish uchun ham ekspertiza tayinlangan. 

Ta’kidlanishicha, tergovga qadar tekshiruv Zangiota tumani prokuraturasi tomonidan nazoratga olingan.