Netanyahu mustaqil Falastin davlatini tuzish g‘oyasini rad etdi

Isroil bosh vaziri Binyamin Netanyahu AQSh prezidenti Jo Baydenning Yaqin Sharqdagi mojaroni ikki mustaqil davlat - Isroil va Falastinning yonma-yon yashashi tamoyili asosida hal qilish borasida kelishish mumkinligi haqidagi fikrini rad etdi. «Men Isroilning Iordan daryosi g‘arbidagi butun hududi ustidan xavfsizlikni to‘liq nazorat qilishi masalasida murosaga bormayman, bu esa Falastin davlatini yaratishga ziddir», deb yozgan u 20 yanvar kuni kechqurun X platformasidagi mikroblogida.

Avvalroq Bayden Netanyahu bilan telefon suhbatidan so‘ng jurnalistlar savollariga javob berar ekan, Isroil bosh vaziri bilan ikki davlatning yonma-yon yashashi tamoyiliga asoslangan kelishuv bo‘yicha murosaga kelishni imkonsiz deb hisoblamasligini ma’lum qilgandi. Bayden hali ham bunga erishish mumkin, degan fikrni bildirdi, chunki unga ko‘ra, «ikki davlat bo‘yicha yechimlarning ko‘plab turlari mavjud». 

Netanyahuning idorasi: bosh vazir pozitsiyasi o‘zgarishsiz qoladi 

Shu bilan birga, Netanyahu idorasi Bayden bilan muzokaralar chog‘ida u ko‘p yillar davomida doimiy ravishda himoya qilgan pozitsiyasini tasdiqlaganini xabar qildi. «HAMASni yo‘q qilgandan so‘ng, Isroil G‘azo sektori Isroilga tahdid solmasligini ta’minlash uchun G‘azo ustidan xavfsizlik nazoratini saqlab qolishi kerak, bu esa Falastin suvereniteti talabiga ziddir», — deyiladi idorada. 

Benyamin Netanyahu Bayden bilan suhbatidan so‘ng darhol Amerika prezidentining taklifini rad etib: «Isroil bosh vaziri hatto eng yaxshi do‘stlarimizga ham «yo‘q» deyishi kerak», dedi.

Isroilda Netanyahuga qarshi namoyishlar

Ayni paytda, Tel-Avivda minglab odamlar Netanyahuga qarshi namoyish o‘tkazib, G‘azo sektorida garovga olingan isroilliklarni ozod etishni talab qildi. Namoyishchilar yangi saylovlar o‘tkazish talabini ilgari surib, Netanyahuni «yovuzlik yuzi» deb atadi. Namoyishlar Hayfa port shahri va Quddusdagi bosh vazir qarorgohi yaqinida ham bo‘lib o‘tdi.

Namoyishchilar aksariyati Benyamin Netanyahuning HAMAS guruhiga qarshi urushdagi kursini tanqid qildi. Ular, shuningdek, tezda o‘t ochishni to‘xtatmasa, garovga olinganlar o‘ldirilishi mumkinligidan xavotir bildirdi. 

Isroil-Falastin mojarosi

7 oktyabr kuni ertalab HAMASning harbiy qanoti - «Izzaddin al-Qassam brigadalari» Isroilga qarshi «Al-Aqso to‘foni» operatsiyasi boshlanganini e’lon qildi. G‘azo sektoridan Isroil tomon minglab raketalar otildi, qurolli guruhlar Isroil aholi punktlariga kirdi.

HAMASning bildirishicha, operatsiya bosib olingan Sharqiy Quddusdagi Al-Aqso masjidiga bostirib kirish va isroillik muhojirlarning falastinliklarga nisbatan zo‘ravonligi kuchayib borayotganiga javoban amalga oshirilgan.

Bunga javoban Isroil armiyasi G‘azo sektorida HAMASga qarshi o‘nlab qiruvchi samolyotlardan foydalangan holda «Temir qilichlar» operatsiyasi boshlanganini e’lon qildi. 

Isroil-Falastin mojarosi avj olgandan beri 23 mingdan ortiq falastinlik halok bo‘ldi. Isroilda qurbonlar soni 1400 dan oshadi. G‘azoning 2,3 million aholisi Isroilning havodan ommaviy bombardimon qilishi va eksklavning to‘liq blokadasi tufayli oziq-ovqat, suv va dori-darmonlar tanqisligidan aziyat chekmoqda.