Qozog‘iston, Qirg‘iziston va O‘zbekiston IIV rahbarlari qo‘shma yig‘ilish o‘tkazdi 

26 yanvar kuni Qozog‘iston poytaxti Ostona shahrida Qirg‘iziston ichki ishlar vaziri – politsiya general-leytenanti Ulan Niyozbekov, Qozog‘iston ichki ishlar vaziri – politsiya general-leytenanti Yerjan Sadenov va O‘zbekiston ichki ishlar vaziri – general-leytenant Po‘lat Bobojonovning uch tomonlama uchrashuvi bo‘lib o‘tdi. Bu haqda Qirg‘iziston Respublikasi Ichki ishlar vazirligi matbuot xizmati xabar berdi. 

Mintaqaviy hamkorlikni rivojlantirish, Markaziy Osiyo mamlakatlari xalqlari farovonligini ta’minlash, do‘stlik va yaxshi qo‘shnichilik munosabatlarini yangilash va faollashtirish masalalariga bag‘ishlangan yig‘ilishda uch mamlakatdan Ichki ishlar vazirligi markaziy apparati xizmati rahbarlari ham ishtirok etdi. 

Ishtirokchilar jinoyatchilikka qarshi kurashishda boshqarmalar o‘rtasida mintaqaviy hamkorlik salohiyatini oshirish masalalarini muhokama qildi. Va ular qo‘shma bayonnomani imzolash orqali muntazam ravishda jinoyat holati to‘g‘risida tezkor, statistik va boshqa ma’lumotlar almashinuvini faollashtirishga kelishib oldi.