Yaman qirg‘oqlari yaqinida yana kema hujumga uchradi

Yamanning janubi-g‘arbiy sohillarida yana kemaga hujum qayd etildi. Britaniya birlashgan qirollik dengiz savdosi operatsiyalari (United Kingdom Maritime Trade Operations, UKMTO) markazi 19 fevral, dushanbaga o‘tar kechasi voqea Moxa port shahridan 35 dengiz milyasi janubda sodir bo‘lganini ma’lum qildi. 

«Kapitan kema yaqinida portlash sodir bo‘lganligi va zarar yetkazilgani haqida xabar berdi. U barcha ekipaj a’zolari xavfsiz ekanligini ma’lum qildi», - deyiladi UKMTO xabarida. Markaz kemaning nomi va turini keltirmadi. 

Keyinroq idora aniqlik kiritishicha, ekipaj, harbiy rasmiylar ma’lumotlariga ko‘ra, kemani tark etgan. Kemalarga ehtiyotkorlik bilan harakat qilish va har qanday shubhali faoliyat haqida xabar berish tavsiya etiladi, deya qo‘shimcha qildi UKMTO. 

Husiychilar Qizil dengizdagi kemalarga hujum qilmoqda

Yamanning Eron tomonidan qo‘llab-quvvatlangan husiychi isyonchilari 2023 yil oktyabr oyida HAMAS harakati Isroilga hujum qilganidan beri Qizil dengizdagi tijorat kemalariga dronlar va raketalar bilan muntazam hujum qilib kelmoqda. Husiychilar Yaqin Sharqdagi mojaroga HAMAS tomonida kirganini e’lon qildi. AQSh va Britaniya o‘z ittifoqchilari ko‘magida yanvar oyi o‘rtalaridan boshlab Yaman Respublikasidagi husiychilar nishonlariga yirik hujumlar uyushtirmoqda. 

Fevral oyi boshida Yevropa Ittifoqi davlatlari Qizil dengizda tijoriy yuk tashishni himoya qilish uchun Aspides nomli harbiy operatsiya o‘tkazishga kelishib oldi. Operatsiyani boshlash bo‘yicha rasmiy qaror 19 fevral kuni Yevropa Ittifoqi tashqi ishlar vazirlarining Bryusselda o‘tadigan konferensiyasida qabul qilinishi kutilmoqda.